порлумон
ЛАХШ. ОМОДАГИИ ҲАМАҶОНИБА БА ИНТИХОБОТ
Дар ноҳияи Лахш бо мақсади дар сатҳи баланд гузарондани маъракаи муҳими сиёсӣ - интихоботи вакилони Маҷлиси намояндагони Маҷлиси Олии Ҷумҳурии Тоҷикистон ва вакилони маҳаллӣ то имрӯз 40 ҳавза ва 52 участкаи интихоботӣ ташкил ёфта, аз ҷониби аъзои комиссияи ноҳиявии интихобот ва раъйпурсӣ вобаста ба пешбарии номзадҳо аз ҳизбҳои сиёсӣ, тартиби кори ҳавзаю участкаҳо 6 қарор бароварда шудааст.
Раҳим Сангаков, раиси комиссияи ноҳиявии интихобот оид ба интихоботи Маҷлиси намояндагони халқ, изҳор дошт, ки дар рафти омодагиҳо ба ин маъракаи муҳими сиёсӣ бештар ҷавонони фаъолу донишманд ҷалб гардиданд.
- Дар ҳар участкаи интихоботӣ 9 нафар ва ҳавзаҳои интихоботӣ 11 нафар аъзои комиссия вобаста шудааст. Аз ҳамаи участкаю ҳавзаҳо доир ба ҷараёни омодагиҳои интихоботӣ, пешбарии номзадҳо, ба роҳ мондани корҳои фаҳмондадиҳӣ ҳисоботи оморӣ омода ва ба Комиссияи марказии интихобот ва раъйпурсии Ҷумҳурии Тоҷикистон пешниҳод мегардад. То имрӯз дар ноҳия аз ҷониби ҳизбҳои сиёсӣ ва ба таври худпешбарӣ номзадии беш аз 40 нафар ба КМИР пешниҳод шудааст, - гуфт Р. Сангаков
Дар ноҳия барои беҳтар фаҳмондани аҳамияти интихоботи дарпешистода ба сокинон дар ҳар гӯшаю канори чашмрас лавҳаю шиорҳо бо навиштаҷоти гуногун, аз ҷумла «Овози шумо тақдирсоз аст», «Интихобот. Бетараф набошед!!!», «Якуми март - интихоботи вакилони Маҷлиси намояндагони Маҷлиси Олии Ҷумҳурии Тоҷикистон ва вакилони маҳаллӣ» насб шудаанд, ки аз омодагии хуби масъулон ба ин чорабинии сиёсӣ дарак медиҳад. Ҳамчунин, пайваста бо мардум вохӯрию суҳбатҳо доир гардида, иншооти барои гузарондани интихобот таъйиншуда рангубор ва таъмир гардида истодаанд.
Ташрифулло САЪДУЛЛОЕВ, «Ҷумҳурият»
Баёни ақида (0) Санаи нашр: 24.01.2020 №: 18 Мутолиа карданд: 638
