фарҳанг
ЛЮ БИН: "ДӮСТИИ ХАЛҚҲОИ МО АЗ ГУЗАШТАИ ДУР МАНШАЪ МЕГИРАД"
Ҳанӯз 2000 сол пеш «Роҳи бузурги абрешим» мамлакатҳои моро натанҳо муттаҳид месохт, балки нуқтаи ибтидоии равобити дӯстонаи халқҳоямонро ифтитоҳ намуд. Пас аз касби соҳибистиқлолии Тоҷикистон ҳарду кишвар муносибатҳои шарикии стратегиро роҳандозӣ ва ҳамкориҳоро дар соҳаҳои гуногун, ки ба марҳалаи наву муҳими рушди худ ворид мешаванд, тавсеа бахшида истодаанд.
Ин нуктаро сафири фавқулода ва мухтори Ҷумҳурии Мардумии Чин дар Ҷумҳурии Тоҷикистон Лю Бин зимни вохӯрӣ бо доираи васеи хабарнигорон ироа намуд. Мавсуф зикр кард, ки Чин имрӯз яке аз сармоягузорони умда ба иқтисодиёти Тоҷикистон ва шарикони боэътимоди тиҷоратии он ба шумор меравад. Таъкид шуд, ки муносибатҳои дӯстонаи байни сарони давлатҳо - Си Ҷинпин ва Эмомалӣ Раҳмон дар тавсеаи равобити дуҷонибаи Тоҷикистону Чин нақши муҳими стратегӣ доранд. Маҳз ҳамин дӯстӣ ва эътимод ба якдигар аст, ки имрӯз беш аз 400 ширкату корхонаҳои Чин дар рушду пешрафти Тоҷикистони соҳибистиқлол саҳми чашмрас гузошта истодаанд.
Бар пояи иттилои сафири фавқулода ва мухтори Ҷумҳурии Мардумии Чин дар Ҷумҳурии Тоҷикистон, табодули молу маҳсулот байни ҳарду кишвар аз 2,75 миллион доллари соли 1992 то ба 660 миллион доллар дар соли 2019 расидааст. Танҳо дар соли сипаришуда ҷониби Чин ба иқтисодиёти Тоҷикистон ба маблағи 210 миллион доллар сармоягузорӣ намудааст. Ҳаҷми умумии сармоягузории ин кишвар ба иқтисодиёти Тоҷикистон 2,398 миллиард доллари амрикоиро ташкил медиҳад.
Лю Бин дар робита ба масъалаи ҳамкориҳои гуманитарӣ ибрози назар намуда, гуфт, ки «ҳоло дар Ҷумҳурии Мардумии Чин беш аз 3500 донишҷӯи тоҷик таҳсил мекунад. Ҳамзамон, дар як қатор муассисаҳои таҳсилоти олии Чин, назири Донишгоҳи забонҳои хориҷии Пекин, Донишгоҳи забонҳои Шанхай ва Донишгоҳи миллии Пекин донишҷӯён ба омӯзиши забони тоҷикӣ фаро гирифта шудаанд». Ба гуфтаи сафир, дар ояндаи наздик ифтитоҳи Маркази фарҳангии Чин дар Душанбе ва Маркази фаҳангии Тоҷикистон дар Пекин дар назар аст.
- Ҳамаи ин пешрафтҳои бесобиқа, бешак, боварию эътимоди халқҳои ҳарду кишварро таҳким бахшида, барои ба роҳ мондани шарикии стратегӣ дар бунёди минтақаи «Як камарбанд - як роҳ» шароити мусоид фароҳам меоранд. Бовар дорам, ки Ҷумҳурии Мардумии Чин ва Ҷумҳурии Тоҷикистон таҳти роҳбарии хирадмандонаи сарони давлатҳоямон - Си Ҷинпин ва Эмомалӣ Раҳмон вазъи мусоиди иҷтимоӣ ва тараққиёти босуръати иқтисодиро таъмин карда, барои боз ҳам беҳтар сохтани шароити арзандаи зиндагии мардум ба комёбиҳои нав ноил мегарданд, - иброз дошт Лю Бин.
Додоҷон РӮЗИЕВ, журналист
Баёни ақида (0) Санаи нашр: 30.01.2020 №: 23 Мутолиа карданд: 701
