порлумон
НОҲИЯИ СИНО. НОМЗАДҲО ВОРИДИ КОРҲОИ ТАРҒИБОТӢ МЕШАВАНД
Дар асоси Қонуни конститутсионии Ҷумҳурии Тоҷикистон «Дар бораи интихобот ба Маҷлиси Олии Ҷумҳурии Тоҷикистон» аз 25 январ то 9 феврал давраи бақайдгирии номзадҳои пешбаришуда дар ҳавзаҳои интихоботӣ идома кард.
Чанде қабл дар ҷаласаи комиссияи ҳавзавии интихобот оид ба интихоботи вакилони Маҷлиси намояндагони Маҷлиси Олии Ҷумҳурии Тоҷикистон дар ҳавзаи ҳудудии якмандатии интихоботии Сино № 4 номзадии Мавлуда Раҷабова (Ҳизби сотсиалистии Тоҷикистон), Баҳодур Раззоқов (Ҳизби ислоҳоти иқтисодии Тоҷикистон), Шоҳмурод Рустам (Ҳизби Халқии Демократии Тоҷикистон), Маъруф Ҳомидов (худпешбар) ба вакилии Маҷлиси намояндагони Маҷлиси Олӣ сабт гардид.
Дар ин бора Мӯсо Асозода, раиси комиссияи ҳавзаи мазкур, ба хабарнигори «Ҷумҳурият» иттилоъ дод. Ба гуфтаи ӯ, баъди се рӯз ба онҳо шаҳодатномаи номзадӣ дода мешавад. Аз 10 то 28 феврал давраи таблиғ ва ташвиқи номзадҳо ба шумор меравад. Дар ин давра, ҳамчунин, вохӯрии номзадҳо бо интихобкунандагон баргузор мегардад. Ба ҳар як номзад имконият дода шудааст, ки дар радио ва телевизиони марказӣ то бист дақиқа оид ба барномаи пешазинтихоботии худ баромад кунад. Ҳар як номзад метавонад то панҷ нафар шахси боэътимоди худро ба комиссияи ҳавзавӣ пешниҳод намояд ва ба онҳо низ шаҳодатномаи шахси боэътимоди номзад дода мешавад. Онҳо имконият доранд дар участкаҳои ҳавзаи муайяншуда корҳои таблиғотиро дар доираи қонунгузорӣ амалӣ намоянд.
Ба гуфтаи Мӯсо Асозода, дар сурате, ки интихобкунандагони ин ё он маҳал ва участкаи интихоботӣ хостори вохӯрӣ бо номзадҳо шаванд, комиссияи ҳавзавии интихобот дар ҳамкорӣ бо мақомоти иҷроияи маҳаллии ҳокимияти давлатии ноҳия барои мулоқот ҷой ва шароити мусоид фароҳам месозанд.
Мунаввари САФАР,
«Ҷумҳурият»
Баёни ақида (0) Санаи нашр: 11.02.2020 №: 31 Мутолиа карданд: 693