ҳуқуқ
СУДИ ОЛИИ ИҚТИСОДӢ. ТАЪМИНИ ИҶРОИ САНАДҲО БЕҲТАР МЕГАРДАД
Бо мақсади баланд бардоштани сатҳи касбият, дониши ҳуқуқӣ, одобу муоширати касбии судяҳо ва кормандони дастгоҳи судҳо охири ҳар моҳ машғулияти семинарӣ баргузор гардида, камбудиҳо ва мушкилиҳои ҷойдошта, сабабҳои бекоршавӣ ва тағйирёбии санадҳои судӣ мавриди муҳокимаи ҷиддӣ қарор гирифта, диққати судяҳо ба риояи дақиқи меъёрҳои қонунҳои моддӣ ва мурофиавӣ, пешгирии хавфҳои коррупсионӣ ва таъмини баррасии саривақтии парвандаҳо ҷалб карда мешавад.
Мавлуда Қаландарзода, раиси Суди Олии иқтисодии Ҷумҳурии Тоҷикистон, бо зикри ин матлаб, ҳамчунин, изҳор дошт, ки дар соли гузашта дар Маркази таълимии судяҳо 9 судяи судҳои иқтисодии ВМКБ, вилоятҳои Суғду Хатлон ва шаҳри Душанбе ва 15 корманди дастгоҳи Суди Олии иқтисодӣ ба такмили ихтисос фаро гирифта шуда, соҳиби сертификат гардиданд.
Бо мақсади таҳияи санадҳои судии асосноку қонунӣ ва ҷорӣ намудани таҷрибаи дурусту ягонаи судӣ қарорҳои Пленуми Суди Олии иқтисодӣ «Дар бораи ошкоро будани муҳокимаи судӣ ва ҳуқуқи дастрасӣ ба иттилоот оид ба фаъолияти судҳо», «Дар бораи аз ҷониби судҳо татбиқ намудани қонунгузорӣ оид ба шартномаи маҳсулотсупорӣ» ва «Дар бораи таҷрибаи татбиқи қонунгузорие, ки ситондани хароҷоти судиро вобаста ба баррасии парвандаҳо дар судҳои иқтисодӣ ба танзим медароранд», китоби «Намунаи ҳуҷҷатҳои мурофиавии иқтисодӣ» ба чоп расида, дастраси судяҳо гардид. Инчунин, дастурамал оид ба тартиби коргузорӣ дар судҳои иқтисодии Ҷумҳурии Тоҷикистон бо забони русӣ тарҷума ва дар шакли китоби алоҳида нашр шуд.
Гуфта шуд, ки соли сипаришуда дар сомонаи суд (www soi.tj) почтаи электронии ҳар як судяи Суди Олии иқтисодӣ ҷойгир карда шуд, ки шахсони иштирокчии парванда имкон доранд, бо судя тавассути он корбарӣ намоянд.
Соли 2019 зимни муроҷиат ба судҳои иқтисодӣ аз ҷониби шахсони воқеиву ҳуқуқӣ зиёда аз 5 миллион сомонӣ боҷи давлатӣ ба Буҷети давлат ворид шуд. Доир ба рӯёндани маблағҳои зарар ва қарзи кредитӣ дар ҳамин давра ба маблағи беш аз 278 миллион сомонӣ қонеъ гардида, зиёда аз 6 миллион сомонӣ боҷи давлатӣ рӯёнда шуд. Оид ба рӯёндани ин маблағҳо тибқи тартиби муқаррарнамудаи қонунгузорӣ варақаи иҷро ирсол шудааст. Таъмини иҷрои санадҳои судӣ нисбат ба солҳои қаблӣ беҳтар гардида, тибқи маълумот соли сипаришуда зиёда аз 97 миллион сомонӣ ҳамчун маблағҳои боҷи давлатӣ ва зарари ба давлат расондашуда рӯёнда шудааст.
- Дастгоҳи Суди Олии иқтисодӣ вазифадор шудааст, ки фаъолияташро боз ҳам тақвият бахшида, камбудиҳои ҷойдоштаро мавриди таҳлилу омӯзиш қарор дода, вобаста ба бартараф намудани онҳо, ҳамзамон, дар ҳамкорӣ бо Маркази таълимии судяҳо оид ба ҷорӣ намудани омӯзиши мавзӯъҳое, ки барои судяҳо муҳиму ба талаботи рӯз мувофиқ, ба монанди, қонунгузории замин, хоҷагиҳои деҳқонӣ, муносибатҳои қарзӣ, ҷамъиятҳои саҳҳомӣ ва дигарҳо рабт доранд, чораандешӣ намояд, - гуфт Мавлуда Қаландарзода.
Лашкар ШАРИФЗОДА, «Ҷумҳурият»
Баёни ақида (0) Санаи нашр: 13.02.2020 №: 33 Мутолиа карданд: 1034
