порлумон
ИСФАРА. НОМЗАДҲО ДАР ТАЛОШИ БА ДАСТ ОВАРДАНИ РАЪЙИ МАРДУМ
Номзадҳо ба вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатии Исфара № 20 дидору мулоқотҳои худ бо интихобкунандагонро идома медиҳанд. Аз ин ҳавза 3 нафар - Абдудазиз Почоев, Бахтиёр Ҷалилов ва Мавзуна Шамсидинзода байни ҳам рақобат мекунанд, ки то ҳол шаш вохӯрӣ дар Ҷамоати деҳоти Чоркӯҳ ва се вохӯрӣ дар Ҷамоати деҳоти Ворух баргузор намудаанд.
Номзадҳо дар ҷараёни мулоқот бо интихобкунандагон, асосан, рӯи барномаҳои пешазинтихоботии худ тамаркуз намуда, омодагии худро ба нақшгузорӣ дар пешрафти Ватани азиз баён доштанд. Онҳо, ки аҳзоби гуногуни сиёсиро намояндагӣ мекунанд, ба пешрафтҳои хоҷагии халқи мамлакат ишора намуда, изҳор доштанд, ки мо дар марҳилаи нави созандагиву бунёдкорӣ қарор дорем ва бо рӯи кор омадани неруҳои тоза дар порлумони кишвар пояҳои ҳуқуқиву иқтисодӣ ва рушду нумӯи минбаъдаи кишвар таъмин хоҳад шуд.
Дар ҳамин ҳол, интихобкунандагон низ дар ҷараёни вохӯрӣ бо номзадҳо фикру мулоҳиза, пешниҳодҳои хешро ҷиҳати иштироки фаъолона дар қабули қонунҳои саривақтӣ баҳри фаъолияти босамари соҳоти гуногун, рушди соҳибкорӣ, вориди технологияи инноватсионӣ ва нанотехнологӣ баён карданд.
Бино ба иттилои раиси комиссияи ҳавзавии интихоботии якмандатии Исфара № 20 Саид Бақоев корҳои ташвиқотиву тарғиботӣ бо мардум дар сатҳи баланди ташкилӣ роҳандозӣ шуда, аз ҷониби нозирони Комиссияи марказии интихобот ва раъйпурсии Ҷумҳурии Тоҷикистон сазовори баҳои мусбат гардидааст. Дар ҳудуди шаҳр зиёда аз 400 навиштаву овезаҳо дар мадди назари сокинони шаҳру ҷамоатҳо қарор гирифта, дар ҳамаи участкаҳои интихоботӣ лавҳаю овезаҳои даъваткунанда ба интихобот насб шудаанд. Барои раъйдиҳандагони имконияташон маҳдуд низ шароитҳои мувофиқ муҳайё гардидаанд.
Ҳамаи 79 участкаи интихоботӣ комилан бо маводи тарғиботӣ, мизу курсӣ, компютер ва дигар васоити алоқа таъмин мебошанд. То имрӯз дар шаҳр 4 маротиба семинари машварати дастурдиҳӣ ҷиҳати дар сатҳи ҷавобгӯй ба меъёрҳои байналмилалӣ баргузор намудани ин маъракаи муҳими сиёсӣ доир шуд.
Мардуми Исфараи бостон чун дигар сокинони манотиқи кишвар дар интихобот бо амри дил фаъолона иштирок ва барои шукуфоии Тоҷикистони азизу рӯзгори шоистаи мардум раъй хоҳанд дод.
Ҷовиди АШТӢ, «Ҷумҳурият»
Баёни ақида (0) Санаи нашр: 19.02.2020 №: 37 Мутолиа карданд: 2689
