порлумон
РАШТ. МУЛОҚОТИ МАҲМАДТОИР ЗОКИРЗОДА БО ИНТИХОБКУНАНДАГОН
Дар доираи чорабиниҳо ва вохӯриҳои пешазинтихоботӣ дар ноҳияҳои водии Рашт, мулоқоти номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи ҳудудии якмандатии интихоботии Рашт, № 12 Маҳмадтоир Зокирзода бо интихобкунандагон дар ноҳияи Тоҷикобод доир гардид. Вохӯриро раиси комиссияи интихоботии ҳавзаи якмандатии Рашт, №12 Муллоҷон Аҳмадов оғоз намуда, зикр кард, ки бояд дар ин маъракаи муҳими сиёсӣ, яъне интихоботи вакилон бо дарки баланди масъулиятшиносӣ иштирок намоем.
Сокини ноҳия Баҳодур Абдусатторов доир ба ҳаёту фаъолият ва хизматҳои шоёни Маҳмадтоир Зокирзода ҳарф зад. Зимни муаррифӣ зикр шуд, ки саҳми Маҳмадтоир Зокирзода зимни фаъолияти меҳнатиаш дар вазифаҳои пурмасъули давлатӣ дар ободонию рушди ноҳия назаррас буда, номбурда ҳамчун ходими давлатию ҷамъиятӣ дар татбиқи сиёсати созандаю бунёдкоронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон хизматҳои шоён намудааст.
Дар назди ҳозирон номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи ҳудудии якмандатии интихоботии Рашт, №12 Маҳмадтоир Зокирзода барномаи пешазинтихоботии худро муаррифӣ намуд.
Барномаи номзад таҳти шиори “Барои пешрафт ва зиндагии шоиста” тарҳрезӣ шуда, самтҳои гуногуни хоҷагии халқро дарбар мегирифт. Аз ҷумла, мусоидат ба татбиқи ҳадафҳои Ҳукумати ҷумҳурӣ ҷиҳати рушди соҳаи кишоварзӣ, истифода аз захираҳои энергетикии кӯҳистон тараққии инфрасохтор дар деҳот, дастрасии бештари аҳолӣ ба ёрии аввалияи тиббӣ, ислоҳот дар соҳаи маорифу фарҳанг, тарғиби ҳунарҳои мардумӣ аз ҳадафҳои умдатарини барнома ба шумор мераванд. Аз барномаи номзад аён гардид, ки ҳадафҳои он асосан ба баланд бардоштани сатҳи некуаҳволии сокинони манотиқи кӯҳистон нигаронда шудаанд.
Чунин мулоқотҳои номзад ба вакилии Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода бо сокинони ноҳияҳои Сангвор, Лахш, Рашт ва Нуробод дар сатҳи баланд ва хотирмон доир гардиданд.
Дилшод АМИРОВ, «Ҷумҳурият»
Баёни ақида (0) Санаи нашр: 19.02.2020 №: 37 Мутолиа карданд: 2827
