ҳуқуқ
ҶИНОЯТ ва ҶАЗО
БОЗДОШТ
Хӯҷа Каримов дастгир ва ба Душанбе оварда шуд
Вазорати корҳои дохилии Ҷумҳурии Тоҷикистон аз дастгир ва истирдоди шаҳрванд Хӯҷа Каримов аз шаҳри Дубайи Аморати Муттаҳиддаи Араб ба Ҷумҳурии Тоҷикистон хабар дод.
Хӯҷа Каримов (Хӯҷа - командир) зодаи ноҳияи Хуросон буда, барои содир кардани ҷиноятҳои бандитизм, одамкушӣ, ранҷу азоб, гаравгонгирӣ ва ғайриқонунӣ нигоҳ доштани силоҳи оташфишон дар кофтукови расмӣ қарор дошт.
Дафтари матбуоти вазорат бо нашри хабари расмӣ дар ин бора, аз шаҳрвандон хостааст, ки агар вобаста ба ҷиноятҳои содиркардаи шаҳрванд Каримов Хӯҷа Раҳимович маълумот ва далеле доранд ва ё мавриди амалҳои ҷинояткоронаи ӯ қарор гирифтанд, тавассути телефони боварии вазири корҳои дохилӣ - 221-21-21 ва рақамҳои 227-10-07, 93-992-01-96 ба раёсати кофтукови ҷиноятии ВКД муроҷиат намоянд.
Боздошти Хӯҷа Каримов, дар шаҳри Дубай ва ба Душанбе овардани ӯ натиҷаи ҳамкориҳои судманди Вазорати корҳои дохилии Ҷумҳурии Тоҷикистон бо субъектони хориҷӣ арзёбӣ мешавад.
КОРРУПСИЯ
боз як заминфурӯшро ба курсии айбдорӣ кашонд
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз оғози парвандаи ҷиноятӣ алайҳи Шукур Мусоев, мутахассиси КДФ «Бақайдгирии молу мулки ғайриманқул» дар шаҳри Исфара, хабар дод.
Бино ба иттилои манбаъ, номбурда замони фаъолияташ дар ин мақом давоми солҳои 2015 – 2017 аз шаҳрванд Мирзобаҳром Раҳматов барои иваз намудани таъйиноти қитъаи замини бошишгоҳи саҳроӣ, воқеъ дар Ҷамоати деҳоти Лаккони шаҳри Исфара 12000 доллари амрикоӣ гирифта, ба ӯ зарари махсусан калони моддӣ расондааст.
Дар робита ба ин ҳолат, нисбат ба Ш. Мусоев бо моддаи 247, қисми 4, банди «б» - и Кодекси ҷиноятии Ҷумҳурии Тоҷикистон (қаллобие, ки ба миқдори махсусан калон содир шудааст) парвандаи ҷиноятӣ оғоз шуда, тафтишоти пешакӣ идома дорад.
ҶАВОБГАРӢ
Боздошти се нафар бо гумони дуздии 8 адад телевизор
Кормандони мақомоти милитсия се сокини шаҳри Душанбе – мардони 24, 26 ва 46 - соларо бо гумони дуздии 8 адад телевизор аз коргоҳи як соҳибкори чинӣ дар пойтахти мамлакат боздошт карданд.
Дар бораи дуздии амволаш шаҳрванди Ҷумҳурии Мардумии Чин, ки муваққатан дар кӯчаи Н. Қарабоеви шаҳри Душанбе иқомат дорад, ба ШВКД – 1 дар ноҳияи Шоҳмансур бо ариза муроҷиат кардааст. Ин амали ҷинояткорона шаби 16 - 17 феврали соли ҷорӣ содир шуда, зарари расондашуда 8 ҳазору 800 сомониро ташкил медиҳад.
Тибқи иттилои сомонаи ВКД, дуздии телевизорҳо аз коргоҳи соҳибкори чинӣ дар ҳамдастӣ ё маслиҳати пешакӣ бо муҳофизи корхонаи мазкур - марди 60 - сола сурат гирифта, ҳоло ин амал мавриди тафтишот қарор дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 20.02.2020 №: 38 Мутолиа карданд: 1087
