ҳуқуқ
"БАҲСИ ДУ ХОҶАГИИ ДЕҲҚОНӢ ДАР НОҲИЯИ ФАРХОР"
Дар Суди Олии иқтисодии Ҷумҳурии Тоҷикистон мақолаи «Баҳси ду хоҷагии деҳқонӣ дар ноҳияи Фархор», ки дар Нашрияи расмии Ҷумҳурии Тоҷикистон - рӯзномаи «Ҷумҳурият» (20 декабри соли 2019, таҳти № 243) нашр шудааст, мавриди омӯзиш қарор гирифт. Тавре аз муҳтавои маводи таҳлилӣ бармеояд, хоҷагии деҳқонии «Осим – 18» - и ноҳияи Фархор норозигиашро аз натиҷаи ҳалли баҳс бо хоҷагии деҳқонии «Толибҷон» - и ноҳияи Фархор изҳор кардааст.
Омӯзиши маводи парванда нишон дод, ки бо ҳалномаи суди иқтисодии вилояти Хатлон аз 2 июли соли 2019 аризаи даъвоии хоҷагии деҳқонии «Осим – 18» ба ҷавобгарии мақомоти иҷроияи маҳаллии ҳокимияти давлатии ноҳияи Фархор, кумитаи идораи замини ноҳия ва хоҷагии деҳқонии «Толибҷон» дар бораи беэътибор донистани қарори раиси ноҳияи Фархор аз 30 январи соли 2019 таҳти № 93 ва бартараф кардани монеагӣ оид ба истифодаи замин рад карда шудааст. Аризаи даъвоии муқобили даъвои хоҷагии деҳқонии «Толибҷон» нисбат ба хоҷагии деҳқонии «Осим – 18», мақомоти иҷроияи маҳаллии ҳокимияти давлатии ноҳия, кумитаи идораи замин ва Ҷамоати деҳоти Ғайрат дар бораи беэътибор донистани қарори раиси ноҳия аз 7 марти соли 2018 таҳти № 98 «Дар бораи додани қитъаи замин барои ташкили хоҷагии деҳқонии «Осим – 18» қонеъ шудааст.
Марҳилаи кассатсионии Суди Олии иқтисодии Ҷумҳурии Тоҷикистон 12 сентябри соли 2019 шикояти кассатсионии хоҷагии деҳқонии «Осим - 18» - ро беқаноат монда, ҳалномаи номбурда эътибори қонунӣ пайдо намудааст.
Далелҳои дар мақола овардашуда, аз ҷумла гӯё аз ҷониби суд қарори раиси Ҷамоати деҳоти Ғайрат аз 26 августи соли 2005 «Дар бораи рушди соҳаи чорводорӣ ба хоҷагии деҳқонии «Толибҷон» вобаста кардани майдони умумии 187, 77 гектар замин» ба асос гирифта шудааст, ҳол он ки хоҷагии деҳқонии «Толибҷон» ҳуҷҷати тасдиқкунандаи замин надорад ва аз ҷониби суд меъёрҳои Кодекси замин ва Қонуни Ҷумҳурии Тоҷикистон «Дар бораи мақомоти худидоракунии шаҳрак ва деҳот» нодуруст татбиқ шудаанд, муҳокима гардид. Мутобиқи талаботи қисми 1 моддаи 96 Қонуни конститутсионии Ҷумҳурии Тоҷикистон «Дар бораи судҳои Ҷумҳурии Тоҷикистон», санҷиши қонунӣ ва асоснок будани санадҳои судие, ки судҳои поёнӣ қабул кардаанд, аз тарафи суди болоӣ тибқи тартиби муқаррарнамудаи қонунгузории мурофиавии Ҷумҳурии Тоҷикистон сурат мегирад.
Аз ин рӯ, ба муроҷиаткунанда тавзеҳ дода мешавад, ки ҳуқуқ дорад, тибқи тартиби муқаррарнамудаи Кодекси мурофиавии иқтисодии Ҷумҳурии Тоҷикистон ба тариқи назоратӣ ба Суди Олии иқтисодии Ҷумҳурии Тоҷикистон муроҷиат намояд.
З. АМИНЗОДА, муовини раиси Суди Олии иқтисодӣ
Баёни ақида (0) Санаи нашр: 24.02.2020 №: 40 Мутолиа карданд: 1042