порлумон
НОМЗАДИ АРЗАНДА
Абдуллозода Ҷамолиддин Абдулло соли 1966 дар Ҷумҳурии Тоҷикистон таваллуд шудааст. Соли 1989 баъди хатми Донишкадаи давлатии тиббии Тоҷикистон ба номи Абуалӣ ибни Сино фаъолияти меҳнатии худро ҳамчун духтури интернаи беморхонаи клиникавии № 5 шаҳри Душанбе оғоз бахшидааст.
Солҳои 1990 - 2014 табиби ҷарроҳи дармонгоҳи № 7, беморхонаи клиникии шаҳрии № 2 - и пойтахт, ҷарроҳ, мудири шуъбаи ҷарроҳӣ ва ҳамчун сардухтур дар беморхонаи клиникавии шаҳрии № 3 пурмаҳсул ифои вазифа намуда, дар самти ободонию рушди беморхона хидматҳои зиёдеро ба иҷро расондааст.
Соли 2014 ба вазифаи сардухтури Муассисаи давлатии “Беморхонаи клиникии ёрии тиббии таъҷилии шаҳри Душанбе” таъйин гардида, то соли 2017 чун сартабиби шинохта баҳри пешрафти соҳаи тандурустӣ ва боз ҳам беҳтаргардонии сатҳи хидматрасонии тиббӣ ва ёрии таъҷилӣ ҳиссаи сазовор гузоштааст.
Шаҳрдории Душанбе фаъолияти назаррас ва навгониҳои офаридаи Ҷамолиддин Абдуллозодаро дар соҳаи тансиҳатии омма ба инобат гирифта, ӯро соли 2017 директори Муассисаи давлатии “Маҷмааи давлатии тандурустии “Истиқлол” таъйин намуд, ки то ҳоло дар ин вазифаи пурмасъулият адои хидмат дорад.
Ҷамолиддин Абдуллозода соли 2002 рисолаи номзадиашро таҳти унвони ”Ташхиси маҷмӯъ ва пешгирии норасоии кӯкҳои рӯдаи дувоздаҳангушта баъди буриши меъда бо усули Бидрот 2” муваффақона ҳимоя намуд. Соли 2011 дар мавзӯи “Ташхис ва ба танзимдарории ҷарроҳии рефлюкси гастрит ва рефлюкси эзофагит дар бемории санги сафро” рисолаи докториро бомуваффақият дифоъ намуда, соҳиби унвони профессор гардид.
Таҳти роҳбарии ӯ аз ҷониби шогирдонаш 5 рисолаи илмӣ ҳимоя гардид, 3 рисолаи номзадӣ ва 1 рисолаи докторӣ дар арафаи ҳимоя қарор доранд. Ҷамолиддин Абдуллозода муаллифи 351 мақолаи илмӣ, 8 монография, 23 дастури методию амалӣ буда, дорои 48 пешниҳоди ихтироъкорӣ ва 11 навоварӣ дар соҳа аст. Ҳамзамон, мавсуф узви вобастаи Академияи илмҳои тиббии Тоҷикистон маҳсуб ёфта, аъзои фаъоли ҲХДТ мебошад.
Хидматҳои бисёрсолаву арзандаи ӯ бо медали “Шафқат”, унвони фахрии “Корманди шоистаи Тоҷикистон” қадр шудаанд. Бо нишонҳои “Аълочии тандурустӣ ва ҳифзи иҷтимоии аҳолии Ҷумҳурии Тоҷикистон” ва “Аълочии фарҳанги Ҷумҳурии Тоҷикистон”, унвони духтури дараҷаи олӣ сарфароз гардидааст.
Имрӯзҳо Ҷумҳурии Тоҷикистон дар остонаи маъракаи азими сиёсӣ - интихоботи вакилони Маҷлиси намояндагони Маҷлиси Олӣ ва маҷлисҳои маҳаллии вакилони халқ қарор дорад.
Қаҳрамони нигоштаи мо низ аз зумраи онҳоест, ки аз миёни халқ баромадаву ҳамеша ҳамроҳу ҳамнафаси халқ аст.
Ин марди шариф ва инсони нексиришт ҳамчун табиби исавиҳуш дар ҷомеа мавқеи сазовор ва обрӯву эътибори зиёд гирифтааст. Аз ин ҷост, ки мавсуфро халқ - сокинони пойтахти мамлакат аз ҳавзаи интихоботии № 23 ба ҳайси номзади арзандаи худ ба вакилии Маҷлиси вакилони халқи шаҳри Душанбе пешбарӣ намудаанд, ки воқеан ҳам боиставу шоиста аст.
Аз ин рӯ, мо бояд чун Ҷамолиддин Абдуллозода барин номзадҳои арзандаро ба вакилии Маҷлиси вакилони халқи шаҳри Душанбе интихоб намоем, ки онҳо, пеш аз ҳама, манфиати сокинони пойтахт ва инчунин, халқу миллатро ҳимоят намоянд.
Интихобкунандагони арҷманд! Номзадии Ҷамолиддин Абдуллозода ҳамчун роҳбари кордону меҳрубон ва қавиирода ба вакилии Маҷлиси вакилони халқи шаҳри Душанбе арзанда буда, ба тарафдории ӯ овоз додани шумо нишонаи меҳанпарастӣ ва ифтихормандист.
Мирзоамин МИРСАИДЗОДА,
собиқадори меҳнат
Баёни ақида (0) Санаи нашр: 25.02.2020 №: 41 Мутолиа карданд: 7749
