маориф
ИНТИХОБИ КАСБ ЧӢ ҚАДАР МУҲИМ АСТ?
Эълон гардидани Солҳои рушди деҳот, сайёҳӣ ва ҳунарҳои мардумӣ дар баробари ободии рустоҳо ва ҷалби сайёҳони хориҷӣ ба Тоҷикистон, ба эҳё гардидани ҳунарҳои мардумии ба гӯшаи фаромӯшӣ рафта замина гузошта, дар дили наврасон нисбат ба касбу ҳунар завқ меафзояд.
Аз ҷумла, таваҷҷуҳ ба фанни технология дар муассисаҳои таълимӣ афзуда, талабот ҷиддӣ гардид. Ҳоло мо – омӯзгорони фанни технология муваззаф ҳастем, ки дар баробари иҷрои нақшаи таълим, ҳамзамон, вижагиҳои касбу ҳунар, таърих ва аҳамияти онҳоро ба насли наврас фаҳмонем.
Равшан аст, ки мардуми тоҷик аз қадим ба ҳунармандӣ, аз ҷумла ба кулолӣ, гаҷкорӣ, чӯбкорӣ, заргарӣ, оҳангарӣ ва амсоли инҳо, шуғл доштанд ва онҳоро аз насл ба насл мерос гузоштаанд. Барои мисол, дар Ҷумҳурии Тоҷикистон устоҳои моҳири чӯбтароше ҳастанд, ки дар дохил ва хориҷи кишвар ҳунару фарҳанги миллиро муаррифӣ мекунанд.
Яке аз вижагиҳои Паёми навбатии Пешвои миллат муҳтарам Эмомалӣ Раҳмон ба Маҷлиси Олии кишвар бартарият додан ба омӯзишу касбу ҳунар аст. Дар Паём Сарвари давлат чунин таъкид карданд: «Ҳукумати мамлакат, вазоратҳои маориф ва илм, меҳнат, муҳоҷират ва шуғли аҳолӣ ва дигар вазорату идораҳое, ки дар сохторашон муассисаҳои таълимӣ доранд, инчунин, раисони вилоятҳо ва шаҳру ноҳияҳо вазифадор карда мешаванд, ки дар муддати панҷ соли оянда шаҳрвандони аз 18 - сола болоро, ки касбу ҳунар надоранд, ба касбу ҳунаромӯзӣ ҷалб намуда, ҷиҳати саросар соҳибкасб кардани аҳолӣ тадбирҳои ҷиддиро роҳандозӣ намоянд».
Пешвои миллат вазъро дар ин самт таҳлил карда, супориш доданд, ки барномаи касбомӯзии шаҳрвандони кишвар барои солҳои 2020 - 2025 таҳия шавад ва масъулон ҷиҳати иҷрои он тадбирҳои мушаххас андешанд. Ҳамчунин, Вазорати меҳнат, муҳоҷират ва шуғли аҳолӣ муваззаф гардид, ки сифати таҳсилот ва касбомӯзиро дар муассисаҳои таълимӣ беҳтар созад ва ихтисосу ҳунарҳоеро, ки барои кишвар заруранд, таъсис дода, ҷиҳати ба шуғл таъмин шудани сокинони мамлакат, бахусус занону духтарон тадбирҳои иловагиро роҳандозӣ намояд.
Вижагии фанни технология дар он аст, ки омӯзгор бояд дар ҷараёни дарс аҳамияти интихоби дурусти касбу ҳунарро ба хонандагон фаҳмонад, то иштибоҳи кӯчак дар оянда таъсири манфии худро ба пешбурди ҷомеа нарасонад. Зеро асоси донишомӯзӣ аз интихоби дуруст оғоз меёбад. Мо дар таҷриба бисёр дидаем касонеро, ки бо даъват, пешниҳод ё иҷборан ба омӯхтани ин ё он касб рафта, муваффақ нашудаанд. Ё бо пушаймонӣ касбу ихтисоси худро тарк карданд.
Ин раванд ҳанӯз ҳам дар донишгоҳу донишкадаҳо ё муассисаҳои касбомӯзӣ идома дорад. Бисёр донишҷӯён ба моҳияти касб ё ихтисоси интихобкардаи худ сарфаҳм нарафта, аз хониш зуд дилгир мешаванд.
Аз ин сабаб, мо, омӯзгорон ва падару модарон ба фарзандон дар интихоби касб мадад намоем, айни муддао мебуд.
Малоҳат ҲАЙДАРОВА, омӯзгори МТМУ № 54, ба номи Лоиқ Шералӣ, шаҳри Душанбе
Баёни ақида (0) Санаи нашр: 28.02.2020 №: 44 Мутолиа карданд: 2883
