ҳуқуқ
ҶИНОЯТ ВА ҶАЗО
ХУШУНАТ ДАР ОИЛА
Зан сирко хӯрд ва шавҳараш панҷ сол зиндонӣ шуд
Суди ноҳияи Спитамени вилояти Суғд шаҳрванд М. Мамаҷонзодаро бо моддаи 109 - и Кодекси ҷиноятии Ҷумҳурии Тоҷикистон (ба худкушӣ расондан) гунаҳкор дониста, ӯро 5 сол аз озодӣ маҳрум кард.
Дар ин бора маркази матбуоти Прокуратураи генералӣ хабар дод. Тибқи иттилои манбаъ, М. Мамаҷонзода моҳи январи соли 2019 дар асоси ақди никоҳи мусулмонӣ бо шаҳрванд П. Абдуллоева оила барпо намуда, ҳамсарашро мунтазам азобу шиканҷа менамудааст.
П. Абдуллоева ба шиканҷа ва муносибати бераҳмонаи шавҳараш тоб наоварда, бо истеъмоли сирко қасд ба ҷони худ кардааст. Дар робита ба ин, прокурори ноҳияи Спитамен дар асоси моддаи 109 - и Кодекси ҷиноятӣ нисбат ба М. Мамаҷонзода парвандаи ҷиноятӣ оғоз намуда, баъд аз анҷоми тафтишоти пешакӣ ба суд ирсол намудааст.
ЗАМИНФУРӮШӢ
Боз як ҳолати қаллобӣ ошкор гардид
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз оғози боз як парвандаи ҷиноятии марбут ба замин ва тасарруфи маблағи пулӣ хабар дод.
Бино ба иттилои маркази матбуоти агентӣ, Сайдалӣ Мирасилов, мудири бахши ҳифзи иҷтимоии аҳолии ноҳияи Зафаробод соли 2015 барои мусоидат ба ҷудо намуда додани 0,08 гектар қитъаи замини наздиҳавлигӣ ба шаҳрванд Камолиддин Худойбердиев аз ӯ 800 доллари ИМА гирифтааст. Номбурда, инчунин, бо ҳамин тарзу усул, яъне ҷудо карда додани қитъаи замини наздиҳавлигӣ аз шаҳрванди дигар – Нуралӣ Сулаймонов низ 1100 доллари ИМА талаб карда гирифта, ба онҳо зарари калони моддӣ расондааст.
Вобаста ба ин ҳолат, нисбат ба С. Мирасилов бо моддаи 247 қисми 3 банди «а» - и Кодекси ҷиноятӣ (қаллобӣ ба миқдори калон) парвандаи ҷиноятӣ оғоз гардида, тафтиши пешакӣ идома дорад.
КОРДЗАНӢ
Марди қаблан судшуда даст ба ҷиноят зад
Кормандони милитсия шахсеро ба гумони қасдан расондани зарари вазнин ба саломатӣ боздошт намуданд, ки қаблан бо моддаи 216 – и Кодекси ҷиноятӣ суд шудааст.
Маркази матбуоти Вазорати корҳои дохилӣ гумонбарро марди 35-сола ном бурдааст, ки сокини деҳоти Ҳ. Алиеви ноҳияи Зафарабод мебошад. Номбурда 18 феврали соли ҷорӣ дар ҳудуди деҳаи Гулистон бо марди 28 - солаи сокини Ҷамоати деҳоти Равшани ҳамин ноҳия муноқиша намуда, ӯро бо зарби корд шадидан захмӣ кардааст.
Дар натиҷа ҷабрдида бо ҷароҳатҳои вазнини ҷисмонӣ дар беморхона бистарӣ гардида, нисбат ба гумонбаршаванда бо моддаи 110 қисми 1 - и Кодекси ҷиноятӣ (қасдан расондани зарари вазнин ба саломатӣ) парвандаи ҷиноятӣ оғоз шудааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 28.02.2020 №: 44 Мутолиа карданд: 659
