ҳуқуқ
КУШТОРИ ОДАМ. ҚОТИЛ ПАСИ ПАНҶАРА РАФТ
Суди ноҳияи Сино Фирдавс Муминов, сокини шаҳри Душанберо паси панҷара равон кард, ки қаблан се маротиба суд шудааст. Ӯ бори охир бо ҳукми суди ноҳияи Шоҳмансур (16 ноябри соли 2016) бо моддаи 248 қисми 2 - и Кодекси ҷиноятии Ҷумҳурии Тоҷикистон ба муҳлати 5 сол аз озодӣ маҳрум шуда, пас аз адои 3 сол ҷазо ба муассисаи ислоҳи сукунат гузаронда шудааст. Вале Фирдавси гумроҳ ба корҳои фоидаовари ҷамъиятӣ машғул нашуда, такроран даст ба ҷинояти вазнин зад, ки он оқибат ба марг анҷом ёфтааст.
Тафтишот муайян кард, ки ҷинояткор 22 сентябри соли 2019 дар кӯчаи Борбади пойтахт ошкорро ба шаҳрванд Артур Тугеев ва завҷааш София Бегалиева дарафтода бо таҳдид ва истифодаи зӯроварӣ телефони мобилии тамғаи «Редми нот-7» - ро (арзишаш 1800-сомонӣ) тасарруф намуда, аз ҷойи ҳодиса ба самти бозори «Деҳқон» фирор менамояд. Ин ҳолат аз назари шаҳрванд Мустафо Наимов (28 сола, истиқоматкунандаи ноҳияи Рӯдакӣ) пинҳон намемонад. Барои дастгир намудани ҷинояткор ӯро пайгирӣ карда, дар назди бозори зикргардида дастгир намудааст. Дар ин ҳолат Фирдавс бо корд ба қисми болои банди дасти чапи М. Наимов задааст, ки дар натиҷа Мустафо ҷароҳати вазнини ҷисмонӣ бардошта, аз хунравии зиёд дар беморхона ба ҳалокат расидааст.
Ин дар ҳолест, ки бо фармони вазири корҳои дохилии Ҷумҳурии Тоҷикистон генерал - полковники милитсия Раҳимзода Рамазон Ҳамро, марҳум Мустафо Наимов барои зоҳир намудани ҳисси баланди ватандӯстӣ, нишон додани корнамоию мардонагӣ ва шуҷоату далерӣ дар мубориза бо ҷинояткорӣ пас аз марг бо медали «Барои далерӣ» қадрдонӣ шуд.
Суд талаботи қонунгузории кишварро ба инобат гирифта, Фирдавс Муминовро бо моддаҳои 248 қисми 3 бандҳои «б, г» (ғоратгарӣ ба миқдори калон ва дар ҳолати ретседивӣ) ва 110 қисми 3 бандҳои «б, в» (қасдан расондани зарари вазнин ба саломатӣ дар ҳолати ретседивӣ, ки боиси фавти ҷабрдида гардидааст) - и Кодекси ҷиноятии Ҷумҳурии Тоҷикистон гунаҳгор дониста шуда, бо татбиқи моддаи 67 қисмҳои 1 ва 3 – и Кодекси ҷиноятӣ, барои маҷмӯи ҷиноятҳо, бо роҳи қисман зам намудани ҷазоҳо ба Муминов Фирдавс ҷазо дар намуди маҳрум сохтан аз озодӣ ба муҳлати 20 сол, таъйин кард.
Дар асоси сархати 4 моддаи 7 - и Қонуни Ҷумҳурии Тоҷикистон “Дар бораи авф” (25 октябри соли 2019), таҳти № 1648, муҳлати ҷазои адонагардидаи маҳрум сохтан аз озодӣ нисбат ба Фирдавс Муминов аз чор як ҳисса кам гардид.
Маҳмадзода ХУРШЕД, судяи суди ноҳияи Сино,
М. БАҲРОМ, “Ҷумҳурият
Баёни ақида (0) Санаи нашр: 02.03.2020 №: 45 Мутолиа карданд: 708