ҳуқуқ
ҶИНОЯТ ВА ҶАЗО
РИШВАСИТОНӢ.
12000 ДОЛЛАР БАРОИ "ҚАБУЛ КАРДАН БА ДОНИШГОҲ"
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз ҳолати коррупсионие хабар дод, ки дар он қаллобӣ ба миқадори махсусан калон сурат гирифтааст.
Бино ба иттилои маркази матбуоти агентӣ, шаҳрванд Басбӣ Қаюмова, худро омӯзгори Донишгоҳи давлатии шаҳри Кӯлоб муаррифӣ намуда, ба шаҳрванд «А» ваъда додааст, ки бар ивази 12000 доллари ИМА ӯро ба Донишгоҳи давлатии тиббии Тоҷикистон ба номи Абуалӣ ибни Сино дохил менамояд.
Баъд аз он ки шаҳрванд «А» дар ин бора ба раёсати Агентии назорати давлатии молиявӣ ва мубориза бо коррупсия дар вилояти Хатлон муроҷиат намуд, нисбат ба Б. Қаюмова парвандаи ҷиноятӣ оғоз гардида, номбурда ҳангоми бо роҳи фиреб гирифтани 2300 доллари ИМА ва 17600 сомонӣ дастгир шуд.
Ҳоло парвандаи ҷиноятӣ нисбат ба Б. Қаюмова бо моддаи 247 қисми 4 банди «б»-и Кодекси ҷиноятӣ (қаллобие, ки ба миқдори махсусан калон содир шудааст) аз рӯи тобеияти тафтишотӣ ба мақомоти прокуратура ирсол гардидааст.
ОДАМРАБОӢ.
БОЗДОШТИ НАФАРЕ, КИ БА ИН ҶУРМ ДАСТ ЗАДААСТ
Кормандони мақомоти милитсия як сокини шаҳри Душанберо, ки аз ӯ марди 67 – сола ном бурда мешавад, ба гумони хиридуфурӯши одамон дастгир карданд.
Дар ин бора маркази матбуоти ВКД хабар дод. Бино ба иттилои манбаъ, гумонбар, соли 2017 ширкати ҶДММ «Имкон - 2015» - ро ташкил намуда, бо маслиҳати пешакӣ бо шаҳрванди шоҳигарии Арабистони Саудӣ бо роҳи фиреб ба боварии зани 43 - солаи сокини кӯчаи Қаҳҳорови пойтахт даромада, ӯро ба шаҳри Риёзи Арабистони Саудӣ бурда, шаш моҳ мавриди истисмори меҳнатӣ, яъне ҳуқуқҳояшро ба пуррагӣ маҳдуд карда, бе музди маош ва соати муқаррарӣ ҳамчун ғулом кор фармудаанд.
Айни ҳол, нисбат ба гумонбаршаванда аз тарафи Прокуратураи генералии Ҷумҳурии Тоҷикистон бо моддаи 130 - и Кодекси ҷиноятӣ (Одамрабоӣ) парвандаи ҷиноятӣ оғоз шуда, тафтишот идома дорад.
МУНОҚИША.
ТАФТИШИ АМАЛИ МАРДЕ, КИ ҲАМСАРАШРО КОРД ЗАД
Дар ноҳияи Кӯшониён амали марде тафтиш мешавад, ки дар ҳолати мастӣ ҳамсарашро бо зарби корд захмӣ кардааст.
Сомонаи ВКД бо нашри хабаре дар ин бора навиштааст, ки ҳодиса дар пайи аризаи зани 35 - сола (ҷабрдида), сокини Ҷамоати шаҳраки Бӯстон - Қалъа ба ШВКД дар ноҳияи Кӯшониён ошкор гардидааст. Марди сархуш, ки 59 сол доштааст, 29 феврали соли ҷорӣ дар хонаи истиқоматиаш бо ҳамсараш муноқиша карда, бо 6 зарби корд ӯро маҷрӯҳ кардааст. Дар натиҷа ҷабрдида ҷароҳатҳои ҷисмонӣ бардошта, дар беморхона бистарӣ гардидааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 4.03.2020 №: 47 Мутолиа карданд: 980