Дар Намоишгоҳи байналмилалии ришта, ки дар маркази ҷаҳонии ришта - шаҳри Истанбули Ҷумҳурии Туркия баргузор шуд, корхонаҳои ресандагии Тоҷикистон -   “Ваҳдат”, “Ресандаи Қӯрғонтеппа”, “Спитамен Текстайлз” ва  “ХИМА Текстил”  ришта ва маҳсулоти дигари пахтагини худро барои  доираи васеи иштирокдорон ба намоиш гузоштанд.

Дар чорабинӣ  нахи пахта, ришта, таҷҳизоту маҳсулоти нассоҷӣ ва  дӯзандагӣ ба маърази тамошо гузошта шуданд. Риштаи пахтагини кишвари мо дар ин намоишгоҳ аз зумраи он маҳсулоте буд, ки бештар мавриди таваҷҷуҳи иштирокдорон аз кишварҳои гуногун  қарор гирифт. Соҳибкорони зиёд пас аз боздиди маҳсулоти нассоҷии Тоҷикистон ҷиҳати ҳамкорӣ ва ташкили корхонаҳои муштарак бо соҳибкорони тоҷик дар ин самт изҳори ҳавасмандӣ намуданд.
Ба гуфтаи Саймумин Камолов, роҳбари Маркази тиҷорати байналмилалӣ дар Тоҷикистон, иштирок дар ин намоишгоҳ барои  корхонаҳои ватанӣ  ҷиҳати роҳ ёфтан ба бозори маҳсулоти нассоҷии минтақа имконияти зиёд фароҳам овард.
- Намоишгоҳи байналмилалии риштаи Истанбул бартарияти риштаҳои пахтагини тоҷикиро нисбат ба маҳсулоти кишварҳои дигар нишон дод. Ҳамин буд, ки ширкатҳои ресандагии Тоҷикистон дар ин ҷо бо истеҳсолкунандагони пештози маҳсулоти нассоҷии  минтақа ошно шуданд  ва  барои мавқеи  худро дар бозори минтақавӣ баланд бардоштан имкон пайдо намуданд.  Соҳибкорони ватанӣ  бо ширкатҳои истеҳсолӣ, воридоткунанда  ва  тоҷирони ин самт  дар минтақа  робитаи мустаҳкам ба роҳ монда,  талаботу интизориҳои бозор ва равандҳои онро омӯхтанд, ки барои минбаъд мувофиқи талаботи бозори ҷаҳонӣ маҳсулот тавлид намудан аҳамияти калон дорад, - гуфт Саймумин Камолов.  
Тавре иттилоъ дода шуд, дар намоишгоҳи мазкур  ширкатҳои ресандагии  қариб  80 кишвари ҷаҳон иштирок намуданд.
 
Ташрифулло САЪДУЛЛОЕВ,  «Ҷумҳурият»