сиёсат
РУСТАМИ ЭМОМАЛӢ: "ҶУМҲУРИЯТ" ФАЪОЛТАРИН НАШРИЯИ МАМЛАКАТ АСТ"
Мақомоти иҷроияи ҳоки-мияти давлатии шаҳри Душанбе кулли ҳайати эҷодии рӯзномаро ба ифтихори 95-умин солгарди нашри нахустин шумораи он самимона табрик гуфта, бароятон саломатӣ, саодату сарбаландӣ ва дар иҷрои вазифаи басо масъулиятноку айни замон пурифтихор барору комёбиҳо орзу менамояд.
Тӯли фаъолияти пурсамару пурмаҳсул ходимони рӯзнома - муҳаррирон, хабарнигорону мусаҳҳеҳон, саҳифабандону аксбардорон бо неруи созандаи эҷодӣ ва қалами буррову сухани нишонрас дар тарғибу ташвиқи дастовардҳои кишвар ва рушду пешрафти ҷомеа саҳми арзандаи худро гузоштаанд.
Бо дастгириву ғамхориҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тайи солҳои соҳибистиқлолӣ ба як манбаи боэътимоди иттилоот, кафили амнияти кишвар ва фаъолтарин нашрияи чопии мамлакат табдил ёфтани рӯзнома ва ҳафтае 5 маротиба бо теъдоди то 50 ҳазор нусха чоп шудани он шаҳодати ин гуфтаҳост.
Бо итминони комил метавон гуфт, ки аҳли эҷоди рӯзнома минбаъд низ бо пешниҳоди матолиби ҷолибу хонданӣ дар иҷрои фармону дастурҳои давлату Ҳукумати мамлакат, боло бурдани маърифати сиёсӣ, хештаншиносӣ, ҳисси ватандӯстиву муҳаббат ба Ватани азизамон, ҳифзи ҳуқуқу озодиҳои шаҳрвандон ва таҳкими оромиву суботи кишвар тамоми дониш ва маҳорати офарандагии худро равона месозанд.
Бори дигар ҷашни 95-солагии рӯзномаи "Ҷумҳурият"-ро ба ҳамаи қаламкашону хонандагони сершумори он табрику таҳният гуфта, бароятон дар инъикоси воқеии ҳаёти имрӯза ва рӯйдоду навгониҳои кишвар барору комёбӣ таманно дорем.
Баёни ақида (0) Санаи нашр: 15.03.2020 №: 54 Мутолиа карданд: 931
