сиёсат
СУҲБАТИ ТЕЛЕФОНИИ ЭМОМАЛӢ РАҲМОН БО СООРОНБОЙ ЖЭЭНБЕКОВ
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 28 март бо Президенти Ҷумҳурии Қирғизистон Сооронбой Жээнбеков телефонӣ суҳбат карда, маҷмӯи масъалаҳои мубрами минтақавӣ ва муносибатҳои дуҷонибаро мавриди баррасӣ қарор доданд.
Дар робита ба ин, президентҳо ба хатари ба таври бесобиқа паҳн гардидани коронавируси нав ва вазъи кунунии ҳассоси ҷаҳонӣ, ки дар натиҷаи ин зуҳороти хатарбор ба вуқӯъ пайвастааст, таваҷҷуҳи хосса зоҳир намуданд.
Ба ин манзур, зарурати идомаи ҳамкориҳои зич дар ҳалли масъалаҳои гирифтани пеши роҳи паҳншавии фаромарзии минбаъдаи бемории сироятӣ ва аҳамияти ҳамоҳангии бештари талошҳои муштарак дар минтақа ба хотири роҳ надодан ба таъсири манфии оқибатҳои пандемия ба ҳамкориҳои тиҷоративу иқтисодии ду кишвар, инчунин, тақвият бахшидан ба ҳамдастиву дастгирии дохилиминтақавӣ таъкид гардид.
Вобаста ба ин, Сарвари давлати мо омодагии ҷониби Тоҷикистонро ҷиҳати дар ин ҷода роҳандозӣ намудани иқдомҳои муштарак бо ҳамаи кишварҳои минтақа иброз доштанд.
Дар рафти суҳбат президентҳо, ҳамчунин, ҷанбаҳои мухталифи масъалаҳои рушду таҳкими муносибатҳои ҳамкории Тоҷикистон ва Қирғизистонро баррасӣ карданд.
Зимнан, зарурати вусъат бахшидан ба фаъолияти Комиссияи муштарак ва гурӯҳҳои кории ҷонибҳо оид ба делимитатсия ва демаркатсияи сарҳади давлатӣ махсус таъкид шуд.
Баёни ақида (0) Санаи нашр: 30.03.2020 №: 61 Мутолиа карданд: 682
