ҳуқуқ
ПРОКУРАТУРАИ ГЕНЕРАЛӢ: "ҶИНОЯТКОРӢ ДАР БАЙНИ НОБОЛИҒОН КОҲИШ ЁФТ"
Содиршавии ҷиноят ва ҳуқуқвайронкунӣ аз ҷониби ноболиғон яке аз масъалаҳои нигаронкунанда буда, ҷиҳати пешгирии он аз ҷониби мақомоти ҳифзи ҳуқуқ пайваста чорабаниҳои зарурӣ роҳандозӣ мешаванд. Хушбахтона, дар натиҷаи амалӣ намудани тадбирҳои таъсирбахш мизони ҷинояткорӣ байни ноболиғон дар як соли охир коҳиш ёфтааст.
Дилшод Хайруллоев, прокурори раёсати назорати иҷрои қонунҳо оид ба ноболиғон ва ҷавонони Прокуратураи генералии Ҷумҳурии Тоҷикистон, коҳиши ҷинояткорӣ дар байни ноболиғонро тасдиқ намуд ва дар суҳбат бо хабарнигори “Ҷумҳурият” иброз дошт, ки соли 2019 аз тарафи ноболиғон ва бо иштироки онҳо 873 ҷиноят сабт шудааст, ки дар умум нисбат ба як соли пеш 34 ҷиноят кам мебошад.
Ба гуфтаи ӯ, соли гузашта 277 ноболиғ дар ҷиноятҳои гурӯҳӣ, аз ҷумла 134 нафар дар якҷоягӣ бо калонсолон ва 143 нафар дар гурӯҳи ноболиғон, иштирок кардаанд. Аз шумораи умумии ноболиғоне, ки дар ин давра ҷиноят содир кардаанд, 223 хонандаи муассисаҳои таҳсилоти миёнаи умумӣ, 2 хонандаи мактаби миёнаи махсус, 3 хонандаи омӯзишгоҳи касбӣ ва 479 нафар бекор (дар ягон муассиса таҳсил намекунанд), мебошанд. Соли сипаришуда 7 ҳолати содир намудани ҷиноят аз ҷониби ноболиғон бо истифодаи корд сабт гардид.
Новобаста аз он ки 70 дарсади ҷиноятҳои аз ҷониби ноболиғон содиршударо дуздӣ ташкил диҳад ҳам, лекин назар ба соли 2018 - ум 12 ҳолат ё 1,9 дарсад кам шудааст. Ҳамзамон, зиёдшавии ҷиноятҳои дуздӣ аз ҷониби ноболиғон дар вилояти Суғд, шаҳру ноҳияҳои Турсунзода, Рӯдакӣ ва Файзобод ба чашм мерасад.
Дилшод Хайруллоев дар суҳбат бо мо оид ба раванди татбиқи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» ва аҳамияти он дар камолоти ҷавонон изҳор дошт, ки ин санади муҳими меъёрии ҳуқуқиест, ки аз иҷрои он чӣ гуна ба воя расидани насли наврас, рушди иҷтимоӣ ва иқтисодии кишвар вобастагии зич дорад. - Ҳолати риоя ва иҷрои қонуни мазкур таҳти назорати доимии мақомоти прокуратура қарор дошта, ҷиҳати ошкор, пешгирӣ ва бартарф намудани қонунвайронкуниҳо дар ин самт мунтазам санҷишҳо гузаронда мешаванд. Дар давраи муайян бо мақсади фаҳмондани мазмуну муҳ-тавои қонун, нақши он дар таълиму тарбияи насли наврас, масъулияти падару модарон, шахсони онҳоро ивазкунанда, омӯзгорон ва дигар ташкилоту муассисаҳои масъул аз ҷониби мақомоти прокуратура 1800 вохӯриву суҳбат гузаронда шуда, дар 213 ҳолат тавассути воситаҳои ахбори омма намоишу суҳбатҳо интишор шудааст, - таъкид намуд ӯ.
Таҳлилҳо нишон медиҳанд, ки маҳз беназорат мондан, ба кори фоиданок машғул нагаштан ва аз омӯзиши илму ҳунар ғофил мондани ноболиғон аз сабабҳои асосии даст ба ҷиноят задани онҳост. Ҳамчунин, собит шудааст, ки бархе падару модарон уҳдадориҳои худро ҷиҳати таълиму тарбияи фарзанд ба таври дахлдор иҷро намесозанд.
Мунаввари САФАР, «Ҷумҳурият»
Баёни ақида (0) Санаи нашр: 31.03.2020 №: 62 Мутолиа карданд: 1078