иқтисод
ЗИНДАГӢ МЕШУКУФАД. БАРДОШТ АЗ НОҲИЯИ ДАНҒАРА
Бахши ҳифзи муҳити зисти ноҳияи Данғара баҳри сарсабзу хуррамгардонии гулгаштҳои шаҳраку деҳот, назди ташкилоту муассисаҳо ва корхонаҳо дар маҷмӯъ, 17000 бех ниҳоли сояафкану боровар, ороишӣ, ҳамешасабз, инчунин 163100 дона гули лола ва 50340 - то гули садбарг шинонданд.
Бино ба иттилои сардори шуъбаи ҳифзи муҳити зисти ноҳия Хуршед Тоиров, имсол аз хориҷи кишвар 290 бех чинор оварда ва дар маҳалу кӯчаҳои шаҳраки Данғара шинонда шуд. Ҳамзамон, барои дар сатҳи баланд таҷлил намудани иди Наврӯз дар 129 кӯза ниҳол, дар гулдонҳо ба миқдори 3240 дона гули лола шинонданд, ки онҳо аз тарафи муассисаи ниҳолшинонӣ ва кабудизоркунӣ парвариш меёбанд. Кормандони шуъбаи ҳифзи муҳити зист бо мақсади беҳдошти муҳити зист, афзун намудани захираҳои табиат, баланд бардоштани маърифати экологӣ каналҳо ва ҳудуди шаҳраку маҳалҳоро аз партовҳо тоза месозанд. Ба наздикӣ шуъбаи ҳифзи муҳити зист бо иштироки идораи давлатии беҳдошти замин ва обёрии ноҳия дар соҳилҳои канали обпартои деҳаи Меҳтари Ҷамоати деҳоти Оқсу, бо мадади аҳолӣ ва хоҷагиҳои деҳқонӣ тозагии соҳил гузаронд. Бо ёрии нақлиётҳои вазнини боркаш, як адад партовгоҳ дар ҳаҷми 25 метри мукааб пурра тоза ва аз кӯчаҳои Световой, М. Турсунзода ва М. Нуралӣ партовҳои зиёд бароварда шуданд. Тоза нигоҳ доштани муҳити зист, ки ҳаёти осоиштаву солимии мардум аз он вобастагии калон дорад, рисолати аслии кормандони шуъбаи ҳифзи муҳити зисти ноҳия мебошад.
Холназар КАСИРОВ, «Ҷумҳурият»
Баёни ақида (0) Санаи нашр: 01.04.2020 №: 63 Мутолиа карданд: 827
