иқтисод
РУШДИ МАЪНАВИЁТ - ОМИЛИ СОЛИМИИ ҲАР ФАРД ВА ҶОМЕА
Бо ибтикори мақомоти иҷроияи ҳокимияти давлатии шаҳри Душанбе таҳти унвони “Рушди маънавиёт - омили солимии ҳар фард ва ҷомеа” дар Донишкадаи давлатии фарҳанг ва санъати Тоҷикистон ба номи Мирзо Турсунзода ҳамоиши маърифатӣ - тарбиявӣ баргузор гардид. Дар он муовини раиси шаҳри Душанбе Мавсума Муинӣ, вакили Маҷлиси намояндагони Маҷлиси Олии Ҷумҳурии Тоҷикистон Гавҳар Шарофзода ва донишҷӯёну устодони донишкада ширкат варзиданд
Ҳамоиш мавзӯъҳои ташаккули тарзи ҳаёти солим, ғановати маънавӣ, таҳаммулпазириву инсондӯстӣ, ҳифзи солимии моддиву маънавии оила, фард ва ҷомеа аз хатару таҳдидҳои номатлуби иҷтимоӣ, бемориҳои сироятӣ, терроризму ифротгароӣ, исрофкорӣ ва фасоди ахлоқӣ, таҳкими андешаи солим, масъулият ва рисолати инсонӣ дар иртибот ба рушди маънавии ҷомеаро фаро гирифт.
Ректори донишкада, доктори илми филология Муҳриддин Низомӣ мавзӯъҳои матраҳшавандаро барои пешрафти таълиму тарбияи насли наврасу ҷавон, ифтихори ватандорӣ, ғурури миллӣ ва ташаккули худшиносии миллӣ муҳим арзёбӣ карда, ҳамзамон таваҷҷуҳи иштирокдорони ҳамоишро ба шинохти дурусти таърих, тарғиби мероси маънавӣ ва суннату оинҳои мардумӣ, ки тайи асрҳо дар хотираи таърихии миллати тоҷик нақш бастаанд, ҷалб намуд.
Мавсума Муинӣ иброз дошт, ки рӯ овардан ба сиёсати ҷавонон тақозои таърих ва назари неку хирадмандона ва ҷавонпарваронаи Пешвои миллат, Президенти кишвар муҳтарам Эмомалӣ Раҳмон мебошад.
Муовини раиси шаҳри Душанбе роҷеъ ба корҳои созандагию бунёдкорӣ дар пойтахти кишвар маълумот дода, гуфт: “Агар дар шаҳраку маҳаллаҳои ҳудуди шаҳри Душанбе аз соли 2010 то соли 2016 ҳамагӣ 56 майдончаи муосири варзишӣ сохта, ба истифода дода шуда бошад, пас тайи се соли охир, таҳти роҳнамоиҳои созандаи Президенти Ҷумҳурии Тоҷикистон муҳтарам Эмомалӣ Раҳмон ва дастгирии ҳамаҷонибаи раиси шаҳр Рустами Эмомалӣ дар пойтахти мамлакат 258 майдончаи варзиш ва бозии кӯдакон бунёд гардид, ки дар ташаккули тарзи ҳаёти солим ва оммавигардонии варзиш нақши бориз мегузоранд”.
Иштирокдорони ҳамоиши маърифатӣ-тарбиявӣ бар ин назар буданд, ки дар рӯҳияи ҳисси баланди миллӣ, садоқат ба давлату миллат, таҳаммулгароӣ, ватандӯстиву хештаншиносӣ, пос доштани арзишҳои миллӣ тарбия намудани насли наврас ва ҷавонон на танҳо вазифаи муҳимтарини ниҳодҳои дахлдор, балки аҳли ҷомеа низ мебошад.
Додоҷон РӮЗИЕВ, журналист
Баёни ақида (0) Санаи нашр: 02.04.2020 №: 64 Мутолиа карданд: 727
