иқтисод
НОҲИЯИ РӮДАКӢ. "ҶУМҲУРИЯТ" БОЗ ПАЙИ МАКТУБ РАФТ
«Чор тарафи маҳаллаи Гравзаводи Ҷамоати деҳоти Чимтеппаи ноҳияи Рӯдакӣ дар иҳотаи корхонаҳост. Теъдоди биноҳои баландошёнаи навсохти ба талабот ҷавобгӯйнабуда бештар шуда, дар онҳо оби нӯшокӣ, корез ва ҳатто таваққуфгоҳи мошину майдонча барои бозиҳои кӯдакона вуҷуд надоранд. Бӯйи ғализи партови бинои баландошёнаи дар дохили корхонаи сангу шағал бунёдёфта тамоми маҳалларо фаро гирифтааст».
Ин сатрҳоро сокинони маҳаллаи мазкур дар номае ба «Ҷумҳурият» навишта, аз идораи рӯзнома хоҳиш намудаанд, ки мавзӯъро пайгирӣ намоем, то ба ҳалли мушкили сокинон таваҷҷуҳ зоҳир гардад. Дар робита ба ин, хабарнигори рӯзнома ба маҳаллаи мазкур рафт ва шоҳиди он гардид, ки мушкилии зикршуда дар маҳалла ҷой дорад. Чоҳи барои корез пешбинигардида дар назди бинои истиқоматӣ кандашуда, аз партов пур гардидааст, балки партовҳои даруни он ба берун баромада, фазои муҳити зистро олуда кардааст.
- Касеро парвои мушкилии мо нест. Замони шӯравӣ дар маҳалла барои пасмондаҳо кӯле вуҷуд дошт. Ҳоло он аз ҷониби баъзе ашхос харида шуда, дар он ҷо корхонаҳо бунёд шудаанд. Соҳибони онҳо намегузоранд, ки биноҳои нав хати корезро ба он ҷо баранд. Дар маҳалла ҳашт бинои навсохт корез надорад. Бошандагони ин мавзеъ чанд маротиба ба соҳибкоре, ки хонаи баландошёнаро сохтааст, муроҷиат намудаанд, вале ба доди онҳо касе нарасид, - гуфт Саъдии Саидумар, сокини маҳалла.
Ҳангоми таҳқиқи номаи шаҳрвандон намояндагони мақомоти иҷроияи маҳаллии ҳокимияти давлатии ноҳияро дар ҷараён гузоштем. Раҷабалӣ Ашуров, муовини раиси ноҳия, гуфт, ки барои бартараф намудани ин мушкилӣ мақомоти иҷроияи маҳаллии ҳокимияти давлатии ноҳия чораҳои қатъӣ меандешад. «Роҳбарияти ноҳия аз вазъи ин маҳалла ба хубӣ огоҳ аст. Мо соҳиби биноҳоро даъват карда, ҳар чи зудтар ҳал кардани ин масъаларо дар миён гузоштем. Ин масъала зери назорат аст».
Дар натиҷаи омӯзиш маълум шуд, ки бинобар мавҷуд набудани хати корезӣ дар биноҳои баландошёнаи маҳалла комиссияи давлатӣ онро қабул накардааст. Аз бахши меъмории ноҳия иттилоъ доданд, ки то мушкили мавриди назар ҳалли худро наёбад, бино ба истифода дода нахоҳад шуд. Аммо, мушкил дар ин ҷост, ки хонаҳо аллакай соҳибони худро ёфтаву дар он зиндагӣ доранд…
Тиллохӯҷа Мирзоев, роҳбари ҶДММ «Итмом» ва молики биноҳои баландошёна, дар суҳбат изҳор дошт, ки аз рӯи лоиҳа мо қубурҳоро кашондем, аммо соҳибмулки нави қитъаи замини кӯли партовгоҳ барои бурдани хати корез ба ин ҷо монеа шуд. Имрӯзҳо роҳи дигар кофта истодаем, то ин масъала ҳалли худро ёбад. Дар ҳамин ҳол, намояндагони мақомоти иҷроияи маҳалли ҳокимияти давлатии ноҳия ва роҳбарияти Ҷамоати деҳоти Чимтеппа моро бовар кунонданд, ки ба зудӣ ин мушкилро рафъ сохта, монеа ва камбудиҳои мавҷударо аз миён мебардоранд.
Шаҳбоз АБРОР, «Ҷумҳурият»
Баёни ақида (0) Санаи нашр: 07.04.2020 №: 68 - 69 Мутолиа карданд: 1041
