ҳуқуқ
ҶИНОЯТ ва ҶАЗО
КОРРУПСИЯ
Боздошти раиси ҷамоат бо 4000 сомонӣ
Кормандони агентии назорати давлатии молиявӣ ва мубориза бо коррупсияи Ҷумҳурии Тоҷикистон раиси Ҷамоати деҳоти Фрунзеи ноҳияи Ҷалолиддини Балхӣ Муҳиддин Самадзодаро ҳангоми аз шаҳрванд «А» гирифтани 4000 сомонӣ ҳамчун пора дастгир намуданд.
Дар ин бора сомонаи агентӣ хабар дода менависад, ки «номбурда ҳамчун шахси мансабдор тахминан моҳи ноябри соли 2019 аз шаҳрванд “А” барои мусоидат кардан оид ба манзур намудани пешниҳод ба мақомоти иҷроияи маҳаллии ҳокимияти давлатии ноҳияи Ҷалолиддини Балхӣ ҷиҳати вобаста намудани 4,10 гектар қитъаи замин маблағи 1200 сомонӣ пешакӣ гирифта, боз овардани 4000 сомониро талаб кардааст».
Раиси ҷамоат моҳи январи соли ҷорӣ ҳангоми гирифтани маблағи боқимонда боздошт шуда, нисбат ба ӯ бо моддаи 319 қисми 3 Кодекси ҷиноятӣ (гирифтани пора) парвандаи ҷиноятӣ оғоз гардида, тафтишоти пешакӣ идома дорад.
ОДАМКУШӢ
Муноқишае, ки бо қатл анҷом шуд
Дар шаҳри Хуҷанд марди 68 - солае, ки қаблан бо моддаи 237 (авбошӣ) суд шудааст, бо гумони қасдан расондани зарари вазнин ба саломатӣ, ки боиси марг гашт, боздошт шуд.
Тибқи иттилои сомонаи Вазорати корҳои дохилӣ, гумонбаршуда 5 апрели соли ҷорӣ дар назди меҳмонхонаи «Эҳсон» - и шаҳри Хуҷанд бо марди 36 - солаи сокини ноҳияи Деваштич вохӯрда, дар натиҷаи муноқишаи баамаломада бо корди хоҷагӣ ба ӯ дарафтодааст. Дар натиҷа, ҷабрдида аз зарби корд ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.
Ҳоло ин амали ҷинояткорона бар асоси моддаи 110 қисми 3 Кодекси ҷиноятӣ (қасдан расондани зарари вазнин ба саломатӣ, ки боиси фавт гардидааст) мавриди тафтишот қарор дорад. Ин модда ҷазои маҳрум сохтан аз озодӣ аз дувоздаҳ то понздаҳ солро пешбинӣ менамояд.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 09.04.2020 №: 70 Мутолиа карданд: 1010
