иқтисод
СУҒД. МАЙДОНИ КИШТИ ПУНБА МЕАФЗОЯД
Пахтакорӣ бахши муҳимтарини соҳаи кишоварзӣ мебошад. Ба хотири аз лиҳози иқтисодӣ манфиатовар будани соҳа, майдони кишти ин зироат сол ба сол зиёд мегардад. Тараққӣ додани пахтакорӣ имкон фароҳам меорад, ки мардум бо ҷойи кор таъмин гардида, даромади худро афзун намояд.
Рушди соҳаи пахтакорӣ пас аз ҳадафи чоруми стратегии миллӣ эълон шудани саноатикунонии босуръати мамлакат аҳамияти боз ҳам бештар касб мекунад. Дар ҳақиқат, равнақи соҳа афзалияти зиёд дошта, ба рушди бемайлони иқтисодиёти кишварамон, хусусан саноат, таъсири мусбат мерасонад.
Абдулазиз Маҳмудзода, сардори шуъбаи истеҳсолии сарраёсати кишоварзии вилояти Суғд, дар суҳбати телефонӣ гуфт, ки кишоварзони вилоят, тибқи дурнамо, соли равон 130 ҳазор тонна пахта рӯёнданианд.
Имсол мувофиқи дурнамо бояд дар майдони беш аз 60 ҳазор гектар пунбадона кишт шавад, ки назар ба соли сипаришуда 1546 гектар зиёд мебошад. Кишоварзони вилоят дар мавсими кишти баҳорӣ аз техника, хусусан 331 тухмипошак, самаранок истифода бурда, рӯзе дар 3 - 4 ҳазор гектар чигит мекоранд.
То 7 апрел дар 6 ҳазору 593 гектар пунбадона кишт гардид. Барои баланд бардоштани ҳосил дар шаҳру ноҳияҳои пахтакори вилоят, аз ҷумла Ашт, Бобоҷон Ғафуров, Зафаробод, Конибодом, Мастчоҳ, Спитамен, Ҷаббор Расулов, тухмии навъҳои аълосифати «Хуҷанд - 67», «Ориёӣ», «Дӯстӣ», «Элита - 39», «Неъмат», «Ирам - 1», «Синзян», «Тиннян», «Флеш», «Глория», ки ба иқлими вилоят мусоид мебошанд, кошта шуд. Барои таъмини хоҷагиҳои пахтакор бо тухмӣ дар вилоят қариб 6 ҳазор тонна чигити хушсифат захира шудааст.
- Пахта зироати нозук ва заҳматталаб буда, ҳосили хуб ба даст овардан танҳо бо роҳи риояи қатъии қоидаҳои агротехникӣ – кишт, ягона, коркарди байни қаторҳои пахта, озуқадиҳӣ бо риояи таносуби нуриҳои минералӣ, инчунин, эмин нигоҳ доштани пахта аз касалӣ ва ҳашароти зараррасон имконпазир аст, - гуфт Абдулазиз Маҳмудзода.
Ҳоло кишти пунбадона дар ноҳияҳои пахтакори вилоят бомаром идома дошта, тибқи нақша, 25 апрел ба анҷом мерасад. Дар маъракаи кишти пунбадона шаҳру ноҳияҳои Конибодом, Мастчоҳ, Ашт, Ҷаббор Расулов ва Бобоҷон Ғафуров пешсафанд.
Кароматулло АТО,
«Ҷумҳурият»
Баёни ақида (0) Санаи нашр: 13.04.2020 №: 72 Мутолиа карданд: 980
