маориф
МАОРИФ ЯКЕ АЗ МАСЪАЛАҲОИ КАЛИДӢ БОҚӢ МЕМОНАД
Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамасола дар паёмҳояшон ба Маҷлиси Олӣ ба соҳаи маориф таваҷҷуҳи махсус зоҳир намуда, рушди он ва баланд бардоштани сифати таълиму тарбияро муҳим арзёбӣ мекунанд.
Сарвари давлат дар Паёми навбатӣ ба Маҷлиси Олӣ (26 декабри соли 2019) иброз доштанд: «Дар марҳалаи кунунии пешрафти Тоҷикистон ба соҳаҳои илму маориф афзалияти аввалиндараҷа дода мешавад, зеро онҳо дар таҳкими пояҳои давлати демократӣ ва ҳуқуқбунёду дунявӣ нақши калидӣ мебозанд. Соли ҷорӣ ба маблағи 500 миллион сомонӣ 130 муассисаи таҳсилоти умумӣ бо зиёда аз 32 ҳазор ҷойи нишаст ба истифода супорида шуд. Аз ин шумора 32 муассиса бо қариб 10 ҳазор ҷойи нишаст аз ҳисоби соҳибкорону шаҳрвандони саховатпешаи кишвар ба маблағи беш аз 122 миллион сомонӣ бунёд шуда, ҳиссаи онҳо дар сохтмон ва таъмиру азнавсозии муассисаҳои соҳаи маориф ва дигар бахшҳо рӯз ба рӯз афзуда истодааст».
Гуфта шуд, ки соли 2020 сохтмони 181 муассисаи таҳсилоти умумӣ дар ҳаҷми 900 миллион сомонӣ бо муҳайё намудани 54 ҳазор ҷойи нишаст пешбинӣ шудааст. То Ҷашни 30 - солагии Истиқлолияти давлатӣ 128 муассисаи томактабӣ ва 338 муассисаи таҳсилоти умумӣ бунёд гардида, дар маҷмӯъ, 1332 муассисаи таълимӣ ва томактабӣ тармиму таҷдид карда мешавад.
Ба роҳбарону кормандони соҳаи маориф таъкид гардид, ки дар баробари чунин дастгириҳои давлат ва афроди ватандӯст сатҳу сифати таълимро дар ҳар як муассисаи таълимӣ, сарфи назар аз шакли моликияти онҳо ва дар ҳамаи зинаҳои таҳсилот баланд бардоранд. Инчунин назорати азхудкунии донишҳои замонавиро пурзӯр гардонда, наврасону ҷавононро ба мутолиаи китобҳои бадеиву илмӣ ташвиқ намоянд, қобилияти эҷодии онҳоро тақвият бахшанд ва ба таълими фанҳои табиатшиносӣ, дақиқ ва риёзӣ таваҷҷуҳи бештар зоҳир намоянд.
Ба таъкиди Сарвари давлат, мардуми мамлакат барои иҷрои ниёзҳои динии худ дар як муддати кӯтоҳи соҳибистиқлолӣ зиёда аз 5 ҳазор масҷид бунёд карданд. Акнун вақти он расидааст, ки маъракаи бунёди мактабҳо ва боғчаву кӯдакистонҳоро вусъат бахшида, дар ин кори хайр ҳама якҷо саъю талош кунем ва саҳми худро барои ояндаи давлату миллат гузорем, яъне ғами фарзандонамонро хӯрем.
Ислоҳи ин мушкилоти ҷомеа, ки давлат ба он афзалият медиҳад, вазифаи ҳар як сокини бонангу номус ва бо иродаву ватандӯст ба ҳисоб меравад ва ин кори хайру савоб аз ҷониби аҳли ҷомеа дастгирӣ меёбад.
Дар баробари ин, Пешвои миллат супориш доданд, ки аз моҳи сентябри соли 2020 дар қатори дигар соҳаҳо музди меҳнати кормандони соҳаи маориф низ 15 дарсад зиёд карда шавад. Ин иқдом бори дигар аз таваҷҷуҳи дурбинонаи Сарвари давлат ба соҳаи маориф гувоҳӣ дода, мо – омӯзгорон ва кормандони соҳаи маорифро муваззаф месозад, ки рисолати худро содиқонаву софдилона иҷро намоем.
Фарзона АБДУРАҲМОНОВА,
мураббияи мактаб - интернати миёнаи махсуси санъати ҷумҳуриявӣ
ба номи Миратулло Атоев
Баёни ақида (0) Санаи нашр: 14.04.2020 №: 73 Мутолиа карданд: 2524
