ҳуқуқ
ҶИНОЯТ ва ҶАЗО
КОРРУПСИЯ
ду корманди мақомоти андозро ба ҷавобгарӣ кашид
Алайҳи ду корманди нозироти андоз дар шаҳри Бохтар барои қаллобӣ ва ё ришваситонӣ парвандаи ҷиноятӣ оғоз шуда, тафтишоти пешакии он идома дорад.
Дар ин бора, маркази матбуоти Агентии назорати молиявӣ ва мубориза бо коррупсия хабар дод. Тибқи иттилои манбаъ, Акбаралӣ Расулов, муовини сардор - сардори шуъбаи нозироти андоз дар шаҳр, дар ҳамдасти бо мутахассиси ҳамин нозирот Тоҷиддин Ҳотамов аз шаҳрванд Д. Сангов, ки дар шаҳри Бохтар ба тиҷорати масолеҳи сохтмонӣ машғул буд, 10000 сомонӣ талаб намудаанд. Кормандони мақомоти андоз аз ин маблағ қаблан 5000 сомониро пешакӣ гирифта, ҳангоми гирифтани 4150 сомонии дигар дар ҷойи ҳодиса дастгир шудаанд.
Ҳоло парвандаи ҷиноятӣ нисбат ба онҳо бар асоси моддаи 247 қисми 2 бандҳои «а», «в», «г»-и Кодекси ҷиноятии Ҷумҳурии Тоҷикистон (қаллобие, ки бо истифода аз мақоми хизматӣ содир шудааст) мавриди тафтишот қарор дорад.
ТАНЗИМ
Суд қонуншиканро ҷазо дод
Як сокини шаҳри Турсунзода барои риоя накардани талаботи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» ба ҷавобгарии маъмурӣ кашида шуд.
Ҳикматулло Болтаев хилофи талаботи қонун амал намуда, 24 январи соли 2020 бидуни сабт дар мақомоти ваколатдор аз соати 1730 то 1840 беш аз 30 нафарро ба хонааш даъват намуда, ба муносибати тӯйи арӯсии духтараш зиёфат оростааст.
Маркази матбуоти Прокуратураи генералӣ дар ин бора хабар дода, афзуд, ки номбурда, ҳамчунин, 25 январи соли ҷорӣ аз Ҷамоати деҳоти Қаратоғи шаҳр барои гузарондани оши арӯсии духтараш аз соати 1600 то 1900 тавсиянома гирифта, вале хилофи талаботи қонун такроран ба мардум зиёфат додааст.
Дар пайи ин амал суди шаҳри Турсунзода шаҳрванд Ҳикматулло Болтаевро бар асоси қонунгузорӣ ба андозаи 100 нишондиҳанда барои ҳисобҳо баробар ба 5800 сомонӣ ҷарима кард.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 14.04.2020 №: 73 Мутолиа карданд: 1268