маориф
СТИПЕНДИЯИ ПРЕЗИДЕНТӢ. ЯК ПЕШНИҲОДИ МУҲИМ
Ман як ҷавони хушбахтам, ки дар чунин кишвари зебо ва озоду соҳибистиқлол умр ба сар бурда, таҳсил мекунам. Шукри чунин Пешвои муаззам дорам, ки пайваста ба ҷавонон таваҷҷуҳу ғамхорӣ зоҳир намуда, ҷиҳати таҳсилу кор бароямон шароитҳои камназир фароҳам аст. Чанд сол пеш ин гуна имкониятҳо муҳайё набуд. Сад шукр, ки Худованд барои мо чунин Пешворо ато фармуд ва он рӯзе, ки ба сари қудрат омаданд, боз аз нав набзи миллат ба тапиш даромад, Ватан аз нав ҷилои зебо гирифт.
Тавре мо медонем, стипендияи президентӣ дар як даврае ташкил шуд, ки хонандагони муассисаҳои таълимии кишвар ба он ниҳоят эҳтиёҷ доштанд. Он имконият фароҳам менамуд, ки толибилмон ба азбарнамоии фанҳои гуногун бо шавқу ҳаваси дучанд машғул гарданд. Фикр мекунам, ки рисолати ин иқдом, аллакай амалӣ гашт. Аз ин лиҳоз, пешниҳод дорам, ки ибораи “гирандаи стипендияи президентӣ” бо мафҳуми “Пайрави Пешво” иваз карда шавад. Ин иқдом эътибору эҳтиромро нисбат ба ин навъи идрорпулӣ дучанд месозад. Аз ҷониби дигар, пешниҳоди мазкур масъулияти кормандони соҳаро ҳангоми интихоби хонандагони арзанда барои додани стипендия меафзояд. Мо бояд на барои гирифтани чунин идрорпулӣ, балки бо чунин Пешвои муаззам ифтихор варзем ва фарзанди содиқи Меҳану пайрави асили Пешвои миллат бошем. Танҳо ҷавонони бонангу ори Ватан пайрави Пешвои миллат буда метавонанд.
Инчунин, илова намудани нишони сарисинагӣ бо навиштаҷоти “Пайрави Пешво” омили ҳавасмандии бештари ҷавонон хоҳад буд. Барои фарқ кардани лентаҳои гирандагони стипендияҳои президентӣ ва ноҳиявӣ (шаҳрӣ) беҳтар аст, то ранги якумӣ сурх ва дуюмӣ сабз бошад. Ин ду ранг, аз тарафи дигар, ифодагари рамзи ҷавонӣ, давраи ҷӯшу хурӯш ва сарсабзиву бақои зиндагист.
То ҷон дар бадан дорам, ҳамеша пайрави Пешвои миллат мемонам ва бар ивази таваҷҷуҳу ғамхориҳои Пешвои миллатам, ваъда медиҳам, ки хуб мехонаму илм меомӯзам ва ба Ватану халқи азизам содиқона хизмат хоҳам кард.
Сайёраи АВАЗ, коромӯзи рӯзномаи «Ҷумҳурият»
Баёни ақида (0) Санаи нашр: 21.04.2020 №: 77 Мутолиа карданд: 2412
