маориф
ММТ: "МУҲЛАТИ БАҚАЙДГИРӢ ТАМДИД ШУД"
Бино ба гуфтаи Хуршед Икромӣ, директори Маркази миллии тестӣ, барои аз қайд гузаштани хоҳишмандон, шурӯъ аз 2 марти соли ҷорӣ дар 33 шаҳру ноҳияи интихобшудаи ҷумҳурӣ 38 нуқтаи доимии бақайдгирӣ ташкил шуда, муҳлати он то 15 апрел муқаррар гардида буд. Аммо мутахассисони марказ барои боз ҳам бештар ҷалб кардани довталабон муҳлати онро то 30 апрел тамдид намуданд.
Ба таъкиди ҳамсуҳбати мо довталаб он ихтисосҳоеро интихоб кунад, ки забони таълимашонро медонад. Падару модарон бояд аз интихобҳои фарзандонашон ҳангоми бақайдгирӣ ва моҳияти онҳо, бахусус аз комбинатсияҳои ихтисосҳо, муассисаҳои таълимӣ, шакл ва намуди таҳсил огаҳии кофӣ дошта бошанд. Омилҳои асосиро дар интихоби ихтисос ва муассисаҳои таълимӣ бояд ба эътибор гирифт. Довталабон дар интихоби касбу ихтисос ва муассисаҳои таълимӣ озоданд, аммо интихоб дурандешона ва дуруст бошад, ба суди довталаб аст.
Ҳамчунин, эҳтимоли рух додани амалҳои ғаразноку ваъдаҳои авомфиребона аз ҷониби қаллобон дар бобати довталабонро дохил кардан ба муассисаҳои таълимии таҳсилоти миёна ва олии касбии ҷумҳурӣ вуҷуд дорад. Бинобар ин, довталабон ва волидайну дигар наздикони онҳоро зарур аст, ки дар ин масъала ҳушёру боэҳтиёт бошанд ва ба доми чунин қаллобон наафтанд.
Масъулон таъкид меварзанд, ки худсанҷиву корбарии довталаб дар истифодаи хизматрасониҳо дар баробари рушди низоми ММТ бояд рушд кунад. Дар чунин ҳол дурри мақсуд осонтар ба даст хоҳад омад.
Тибқи тартиби муқарраркардаи Ҳукумати Ҷумҳурии Тоҷикистон, барои шахсони то 21 - солае, ки ятими кулл ё бепарасторанд, пурра, шахсони то 21 - солае, ки падар ё модарашон вафот кардааст ё дар парастории яке аз онҳоянд, маъюбони гурӯҳҳои I, II ва “кӯдакони маъюб” панҷоҳ дарсад аз пардохти маблағ барои хизматрасонии ИМД озоданд. Шахсони дорои имтиёзҳои зикргардида ҳангоми бақайдгирӣ бояд ҳуҷҷатҳои дахлдорро пешниҳод кунанд.
Бузургмеҳри БАҲОДУР,
«Ҷумҳурият»
Баёни ақида (0) Санаи нашр: 21.04.2020 №: 77 Мутолиа карданд: 2343
