ҳуқуқ
ҶИНОЯТ ва ҶАЗО
РИШВАСИТОНӢ
8100 сомонӣ масъули "Мисбоҳиён" - ро ба додгоҳ бурд
Муовини директори ҶДММ «Мисбоҳиён» Аҳлиддин Зоидов, барои гирифтани пора ба маблағи 8100 сомонӣ аз довталабони курси ронандагӣ гунаҳгор дониста мешавад.
Тибқи иттилои маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон, ӯро кормандони агентӣ дар ҳоли гирифтани ришва аз шаҳрванд «А» дастгир намуданд. А. Зоидов ин миқдор маблағро барои ба курси ронандагӣ дохил намудани се нафар талаб намудааст.
Манбаъ зикр менамояд, ки парвандаи ҷиноятӣ нисбат ба муовини директори ҷамъияти номбурда бо моддаи 279 қисми 3 Кодекси ҷиноятӣ (Ришвадиҳии тиҷоратӣ аз ҷониби шахсе, ки вазифаи идоракуниро дар корхонаи тиҷоратӣ ё дигар корхона анҷом медиҳад…) баъд аз тафтиши пешакӣ барои моҳиятан баррасӣ намудан ба суд ирсол шудааст.
ҚАЛЛОБӢ
Ҷавони қаблан судшуда боз даст ба ҷиноят зад
Кормандони мақомоти милитсия дар шаҳри Конибодом ҷавони 24 - солаеро боздошт намуданд, ки дар содир намудани кирдори қаллобӣ дар ҳолати ретсидивӣ гумонбар мешавад.
Бино ба иттилои дафтари матбуоти ВКД, гумонбар, ки қаблан бо моддаи 244 қисми 2 Кодекси ҷиноятӣ (дуздӣ) суд шудааст, моҳи феврали соли ҷорӣ ба боварии марди 31 - солаи сокини Ҷамоати деҳоти Лоҳутии шаҳри Конибодом даромада, бо роҳи фиреб аз ӯ 240 ҳазор сомонӣ гирифта, барнагардондааст.
Дар робита ба ин кирдор, нисбат ба боздоштшуда бо моддаи 247 қисми 4 Кодекси ҷиноятӣ (Қаллобие, ки дар ҳолати ретсидивии махсусан хавфнок ва ба миқдори махсусан калон содир шудааст) парвандаи ҷиноятӣ оғоз шуда, тафтишот идома дорад. Ин дар ҳолест, ки вазнинтарин ҷазои ин банди қонун аз ҳашт то дувоздаҳ соли зиндонро пешбинӣ менамояд.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 21.04.2020 №: 77 Мутолиа карданд: 1185