маориф
ТО ҒОФИЛ НАМОНЕМ...
Бо иқдоми хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рӯ ба китобу китобхонӣ овардани сокинони кишвар фоли нек аст. Дар замони рушди босуръати техникаву технология танҳо китоб аст, ки шаҳрвандонро аз ифрот, тамошои наворҳои ғайриахлоқӣ ва ҷангӣ, ҳамчунин, аз бемориҳои асаб ва чашм эмин медорад.
Дар самти худшиносии милливу динии мардуми мо корҳои зиёди сиёсиву ҳуқуқӣ ва маънавию тарбиявӣ ба анҷом расонда бошад ҳам, вале таҳлилҳо нишон медиҳанд, ки мушкилоту камбудиҳо ҳанӯз хеле зиёданд. Ин норасоиҳо на бо суханони хушку холӣ, тарғиботи мавсимӣ ва ҳатто ифтихороти зоҳирӣ, балки танҳо тавассути тарбияи муназзами маънавӣ ва ҳуқуқии ҳар фарди ҷомеа - аз оила то коргоҳ бартараф карда мешаванд.
Дар робита ба ин, Пешвои миллат муҳтарам Эмомалӣ Раҳмон дар Паёми навбатии хеш масъалаи чопи ҷадиди китоби безаволи аллома Бобоҷон Ғафуров – «Тоҷикон»- ро ба миён гузошта, зикр карданд, ки дар ташаккули ҳамаҷиҳатаи худшиносии насли наврас ҳанӯз камбудиҳо ҳастанд. Бо назардошти зарурати мутолиаи китоб ва нақши он дар баланд бардоштани маънавиёти мардум, ташаккули завқи бадеӣ ва зебоиписандӣ Пешвои миллат ба ниҳодҳои дахлдор дастур доданд, ки чопи китобҳои бадеиро зиёд намуда, дар як сол хондани на камтар аз панҷ китоб ва ҳифзи асарҳои манзуму мансури адибони гузаштаву муосирро ба роҳ монанд ва иҷрои онро зери назорати қатъӣ қарор диҳанд. Ҳамзамон, Сарвари давлат дар Паём дар бораи аз гардиш мондани китоб, ки ҷузъи муҳими сарвати маънавии ҷомеа маҳсуб меёбад, ибрози нигаронӣ намуда, таъсири паёмадҳои манфии онро барои фарҳанги миллӣ ёдовар шуданд. Аз таҳлилҳои Сарвари давлат бармеояд, ки «Дар солҳои 2014 - 2019 аз ҳисоби Вазорати маориф ва илм қариб 6 миллион нусха ва аз ҳисоби Вазорати фарҳанг беш аз 2 миллион нусха китоби бадеӣ ба нашр расидаанд. Вале як қисми онҳо ба гардиш ворид нагардида, то ҳол дар анборҳо нигоҳдорӣ мешаванд». Барои раҳоӣ аз вазъияти баамаломада роҳбарони мақомоти иҷроияи ҳокимияти давлатии вилоятҳо ва шаҳру ноҳияҳо вазифадор шуданд, ки «бо мақсади зиёд кардани фонди китоб барои китобхонаҳои соҳавӣ ва муассисаҳои таҳсилоти умумӣ маблағҳои зарурӣ ҷудо намоянд».
Дар маҷмӯъ, меҳвари асосии Паёми навбатии Сарвари давлат китобу китобхона ва маърифату фарҳанги воло буд. Дар ин росто, фаъол шудани муассисаҳои таълимӣ ногузир аст. Махсусан, китобдорони кишвар аз тамоми имкониятҳо бояд истифода баранд, агар ин ё он китоб камёфт аст, ба Вазорати фарҳанги ҷумҳурӣ муроҷиат карда, хазинаи худро комил гардонанд.
Манижа ДОДХУДОЕВА, омӯзгори МТМУ № 59, шаҳри Душанбе
Баёни ақида (0) Санаи нашр: 22.04.2020 №: 78 Мутолиа карданд: 2304
