ҳуқуқ
ҶИНОЯТ ва ҶАЗО
ПОРА
раиси ҷамоатро ба ҷавобгарӣ кашид
Раиси Ҷамоати деҳоти Пошкенти шаҳри Истаравшан Абдувосит Ваҳобов барои аз хизмати ҳарбӣ озод намудани шаҳрванд Ш. Ёқубов 2500 доллари ИМА талаб намудааст.
Дар ин бора маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар медиҳад. Тибқи иттилои манбаъ, раиси ҷамоат ҳамчун шахси мансабдор ин маблағро дар се ҳолат аз падари Ш. Ёқубов - З. Ёқубов гирифта, бо ин роҳ ба ӯ зарари калони молиявӣ расондааст.
Ҳоло оид ба ин ҳолат нисбат ба А. Ваҳобов бо моддаи 247 қисми 3 банди «а»-и Кодекси ҷиноятӣ (қаллобие, ки ба миқдори махсусан калон содир шудааст) парвандаи ҷиноятӣ оғоз гардида, тафтишоти пешакӣ идома дорад.
"ЗАМИНФУРӮШ"
Боздошти шахсе, ки пирамарди 80 - соларо фиреб дод
Дар ноҳияи Абдураҳмони Ҷомӣ кормандони милитсия марди 61- солаеро боздошт намуданд, ки аз пирамарди 80 - сола барои ҷудо намуда додани қитъаи замин бо роҳи фиреб 8 ҳазор доллари амрикоӣ гирифта, ба манфиати шахсиаш истифода бурдааст.
Бар пояи гузориши сомонаи ВКД, номбурда моҳи июли соли 2014 дар ҳамоҳангӣ бо собиқ мутахассиси шартномавии шуъбаи заминсозии ҳамин ноҳия, ки аз ӯ марди 42 – сола ном бурда мешавад, аз пирамард барои ҷудо намудани 0,15 гектар қитъаи замини наздиҳавлигӣ аз ҳисоби заминҳои ҶДММ «Технотекстил» ин маблағро гирифтааст.
Вобаста ба ин ҳолат бар асоси моддаи 247 қисми 3, банди «а» (қаллобӣ ба миқдори махсусан калон) ва 3381 қисми 2, банди «б» - и Кодекси ҷиноятӣ (ғайриқонунӣ додани қитъаи замин) парвандаи ҷиноятӣ оғоз шудааст.
ДУЗДӢ
2 нафар ба гумони рабудани чорво ба даст афтоданд
Кормандони мақомоти корҳои дохилӣ дар асоси аризаи як сокини ноҳияи Ёвон бародарони 31 ва 27 - соларо бо гумони дуздии чорво дастгир намуданд.
Бино ба иттилои ВКД, гумонбарон шаби 16 ба 17 апрели соли ҷорӣ 7 сар чорвои калони шохдорро аз заминҳои чарогоҳи Ҷамоати деҳоти Ҳ. Ҳусейнови ҳамин ноҳия дуздидаанд.
Боздоштшудаҳо сокинони ноҳияи Ёвон буда, бо ин кирдори ҷинояткорона ба соҳиби чорво 29 ҳазор сомонӣ зарар расондаанд. Ҳар ду гумонбар ҳоло дар боздошт қарор дошта, тафтишоти ҳодиса давом дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 23.04.2020 №: 79 Мутолиа карданд: 1301