ҳуқуқ
ДАР РОСТОИ ҲИМОЯИ МАНФИАТҲОИ МИЛЛӢ
Изҳороти маркази матбуоти Прокуратураи генералӣ дар бораи қатъи сомонаҳои «аkhbor.com» ва «nahzat.ru»
- Сомонаҳои интернетии «аkhbor.com» ва «nahzat.ru» хилофи талаботи қонунгузории ҷумҳурӣ амал намуда, ғояву ақидаҳои ифротгароёнаи ташкилотҳои террористӣ - экстремистии «Ҳизби наҳзати исломӣ», «Паймони миллии Тоҷикистон» ва дигар равияҳои тундгароро, ки фаъолияташон бо ҳалномаҳои судӣ дар Ҷумҳурии Тоҷикистон манъ шудааст, паҳн менамоянд.
Маркази матбуоти Прокуратураи генералии Ҷумҳурии Тоҷикистон бо баёни ин матлаб расман изҳорот пахш намуда, таъкид мекунад, ки сомонаҳои ғаразҷӯ бо ин амали худ ба барангехтани кинаю адовати миллӣ, маҳалгароӣ, хусумат, бадбинии иҷтимоию мазҳабӣ даст зада, барои бо роҳи зӯроварӣ сарнагун кардани сохти конститутсионӣ даъват менамоянд.
Дар изҳорот гуфта мешавад: «Таҳлили маводи интишоркардаи ин сомонаҳо нишон медиҳад, ки муҳтавои аслии матлабҳо аз таҳрифи воқеият, пешниҳоди ахбори бардурӯғ ва иғвоангез иборат буда, он ҷиҳати ба вуҷуд овардани ҳисси нобоварӣ ва норозигии аҳолӣ нисбат ба сохти Конститутсионии Ҷумҳурии Тоҷикистон равона карда шудааст. Ҳамзамон, ин амали ҷинояткорона баҳри ҷалби маблағгузорон аз ҳисоби созмону ташкилотҳое, ки мақсади ноором гардондани вазъи сиёсиву иҷтимоиро дар кишвари мо доранд, равона гардидааст».
- Таъсис ва пешбурди кори сомонаҳои интернетӣ бо ҳадафҳои муайян, суиистифода аз эътиқод ва мафкураи мардум дар замони муосир яке аз усулҳои маъмули фаъолияти хадамоти махсуси баъзе давлатҳои хориҷӣ маҳсуб меёбад. Таҳти шиори «гуногунрангӣ» ва ба «тарзи фаврӣ» додани маълумоти ғаразнок дар бораи рӯйдодҳои ҷумҳурӣ хадамоти махсусе, ки «аkhbor.com» ва «nahzat.ru» - ро маблағгузорӣ мекунад, мақсад дорад, ки дар Ҷумҳурии Тоҷикистон вазъияти солҳои 90 - уми асри гузашта такрор ёбад, - таъкид шудааст дар изҳорот.
Маркази матбуоти Прокуратураи генералӣ дар охир зикр намудааст, ки аксарияти мақолаҳо ва хабарҳое, ки дар сомонаҳои зикршуда нашр мешаванд, боиси ба вуҷуд овардани низоъҳои гуногуни миллӣ, нажодӣ, маҳалгароӣ ва ё динӣ дар байни хонандагони онҳо мегардад, ки тибқи талаботи моддаи 189 Кодекси ҷиноятии Ҷумҳурии Тоҷикистон барои чунин амалҳо ҷавобгарии ҷиноятӣ пешбинӣ гардидааст. Аз ин рӯ, кирдори ашхосе, ки хилофи Конститутсия ва қонунҳои амалкунанда бо созмонҳои террористӣ ва сомонаҳои манфиатҳои онҳоро ҳимоякунанда ҳамкорӣ менамоянд, тибқи талаботи қонун баҳогузорӣ мешавад.
Ёдовар мешавем, ки Суди Олии Ҷумҳурии Тоҷикистон аризаи Прокуратураи генералӣ дар бораи бастани сомонаҳои «аkhbor.com» ва «nahzat.ru» - ро қонеъ намуда, бо судури як ҳалнома аз 18 феврали соли 2020 фаъолият, воридоту паҳн кардани аудиосабтҳо, видеонаворҳо ва маводи чопии ин сомонаҳоро дар Ҷумҳурии Тоҷикистон манъ кард.
«ҶУМҲУРИЯТ»
Баёни ақида (0) Санаи нашр: 28.04.2020 №: 82 Мутолиа карданд: 1236
