иқтисод
КИШОВАРЗӢ. СОҲАЕ, КИ ДАР НОҲИЯИ БОБОҶОН ҒАФУРОВ АВЛАВИЯТ ДОРАД
Соли равон, тибқи дурнамо, дар хоҷагиҳои кишоварзии ноҳияи Бобоҷон Ғафуров дар 23 ҳазор гектар замин кишти зироат гузаронда мешавад.
- Ин нукта зимни мулоқоти раиси вилояти Суғд Раҷаббой Аҳмадзода бо фаъолони ноҳия зикр гардид, - иброз дошт Музаффар Юнусов, сардори шуъбаи иттилоотию таҳлилии дастгоҳи раиси вилоят.
Бо мақсади зиёд кардани ҳаҷми истеҳсоли маҳсулоти кишоварзӣ ва таъмини аҳолӣ бо маҳсулоти хушсифат соли равон заҳматкашони ноҳия тасмим гирифтанд, ки дар 7371 гектар ғалла, 8400 гектар пахта, 2544 гектар сабзавот, беш аз 900 гектар картошка, 500 гектар полизӣ ва 3959 гектар хӯроки чорво кишт намоянд. Инчунин, барои гирифтани ду - се ҳосил ва ба роҳ мондани истифодаи самараноку оқилонаи заминҳои корами обӣ гузарондани кишти такрории зироати кишоварзӣ дар 3 ҳазор гектар пешбинӣ шудааст.
Иттилоъ доданд, ки дар семоҳаи аввали соли равон ҳаҷми умумии истеҳсоли маҳсулоти кишоварзӣ дар ҳамаи шаклҳои хоҷагидорӣ ба 163167,9 ҳазор сомонӣ баробар гардид. Барои ба гардиши кишоварзӣ даровардани заминҳои бекорхобида низ тадбирҳо андешида мешаванд. Соҳибкорон дар 150 гектар замини бекорхобида боғ бунёд карданд.
Зикр гашт, ки таъмини амнияти озуқаворӣ ба иҷрои босифати корҳои саҳроӣ вобастагии калон дошта, масъулони соҳаи кишоварзӣ ва деҳқонону сокинон бояд аз заминҳои кишоварзиву наздиҳавлигӣ пурсамар истифода намоянд. Ба масъулон ҷиҳати иҷрои нақшаи пешбинишудаи кишти зироат, ҳарчи зудтар ба анҷом расондани кишти пахта ва картошка, истифодаи оқилонаи заминҳои наздиҳавлигӣ, таъмини фаъолияти муназзами гармхонаву сардхонаҳо, ба гардиши кишоварзӣ даровардани заминҳои холимонда ва зиёд намудани ҳаҷми истеҳсоли маҳсулоти кишоварзӣ дастур дода шуд.
Кароматулло АТО,
«Ҷумҳурият»
Баёни ақида (0) Санаи нашр: 30.04.2020 №: 84 Мутолиа карданд: 1020
