иқтисод
ҲИФЗИ ЧАРОГОҲҲО АМАЛИ ДАСТАҶАМЪИРО ТАҚОЗО МЕНАМОЯД!
Посух ба матлаби «Чарогоҳҳо ба нигоҳубин ниёз доранд», ки 13 феврали соли 2019 дар рӯзномаи «Ҷумҳурият» (№ 33) ба табъ расидааст.
Матлаби «Чарогоҳҳо ба нигоҳубин ниёз доранд» дар Вазорати кишоварзӣ мавриди таҳлилу баррасӣ қарор гирифт.
Мусаллам аст, ки ҳолати хуби чарогоҳҳо барои рушди соҳаи чорводорӣ ва дар маҷмӯъ, таъмини амнияти озуқавории мамлакат мавқеи муҳим дорад. Мутобиқи маълумот, масоҳати умумии чарогоҳҳои кишвар 3833465 гектарро ташкил медиҳад, аз ҷумла дар Вилояти Мухтори Кӯҳистони Бадахшон 734035, вилоятҳои Суғд 784036, Хатлон 1226871 ва дар шаҳру ноҳияҳои тобеи ҷумҳурӣ 1088523 гектарро. Чарогоҳҳо ва инфрасохтори онҳо (роҳҳои чорвогузар, майдонҳои дамгирӣ ва обдиҳии чорво, кӯпрукҳои чорвогузар) дар ҷумҳурӣ манбаи асосии таъмини хӯрокаи чорвои калони гӯштӣ, қутос, гӯсфанду буз ва асп буда, зиёда аз 70%-и талаботи солонаи онҳоро таъмин менамоянд.
Мутаассифона, солҳои охир тағйирёбии глобалии иқлим ба ҳосилнокӣ, таркиби биологӣ ва ғизонокии алафи чарогоҳҳо пайваста таъсири манфӣ мерасонад. Аз ҷониби дигар, ҳамасола саршумори чорво рӯ ба афзоиш дорад, он ҳатто нисбат ба солҳои 90-уми асри гузашта зиёд гардидааст. Зиёд намудани саршумори чорво ва дар ин замина афзун гардондани ҳаҷми истеҳсоли маҳсулоти чорводорӣ – ин мусоидат ба татбиқи ҳадафҳои стратегии мамлакат, хусусан таъмини амнияти озуқаворӣ ва саноатикунонии босуръат, мебошад. Аз ин лиҳоз, танзиму истифодабарии оқилонаю самаранок ва мақсадноки чарогоҳҳо дар пешрафти соҳаи чорводорӣ, яке аз омилҳои асосӣ ба ҳисоб меравад.
Айни ҳол бо истифода аз имкониятҳои мавҷуда иншооти инфрасохтории чарогоҳҳо, аз ҷумла роҳҳои чорвогузар, майдонҳои дамгирии чорво ва кӯпрукҳои чорвогузар, марҳила ба марҳила таъмир ва барқарор карда, дар самти истифодаи самараноки чарогоҳҳо, беҳтар намудани ҳолати онҳо, гузарондани таҳқиқоти геоботаникию мониторинги доимӣ, ташкили харитаи умумии чарогоҳҳо, риояи стандартҳои мавҷуда ва амалӣ намудани бандҳои дахлдори Нақшаи чорабиниҳо оид ба иҷрои Қарори Ҳукумати Ҷумҳурии Тоҷикистон аз 27.03.2018, № 160 «Дар бораи Барномаи маҷмӯавии рушди соҳаи чорводорӣ дар Ҷумҳурии Тоҷикистон барои солҳои 2018-2022» вазорат якҷо бо Академияи илмҳои кишоварзии Тоҷикистон, Кумитаи давлатии идораи замин ва геодезии Ҷумҳурии Тоҷикистон ва мақомоти иҷроияи ҳокимияти давлатии вилоятҳо ва шаҳру ноҳияҳо корҳои муайяни заруриро ба анҷом мерасонанд. Ҳамасола бо истифода аз маблағҳои буҷетии барои амалисозии барнома пешбинигардида масоҳати муайяни чарогоҳҳо бо усулҳои куллӣ ва сатҳӣ беҳтар гардонда мешавад.
Ҳар як истифодабарандаи чарогоҳ вазифадор аст, ки барои пешгирии гирифторӣ ба эрозия ва селшӯии чарогоҳ саҳми худро гузорад. Аз ин рӯ, корҳои банақшагирӣ ва лоиҳакашӣ доир ба ҳифз ва истифодаи самараноки захираҳои табиӣ, аз ҷумла чарогоҳҳо, зарурати муносибати дастаҷамъонаро пеш мегузорад.
Мирзозода Музаффар Бурҳон, муовини вазири кишоварзии Ҷумҳурии Тоҷикистон
Баёни ақида (0) Санаи нашр: 30.04.2020 №: 84 Мутолиа карданд: 619
