ҳуқуқ
ҶИНОЯТ ва ҶАЗО
ҚАЛЛОБӢ
Ҷавобгарии кормандони милитсия барои ришваситонӣ
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз оғози парвандаи ҷиноятӣ нисбат ба ду корманди мақомоти милитсия бо ҷурми қаллобӣ хабар дод.
Тибқи иттилои маркази матбуотии агентӣ, Баҳрулло Боқиев, муфаттиши шуъбаи тафтишотии раёсати Вазорати корҳои дохилӣ дар вилояти Суғд, дар ҳамдастӣ бо Солибой Солеҳзод, ваколатдори оперативии ҳамин раёсат, дар ду ҳолат даст ба ришваситонӣ задаанд. Онҳо бори аввал аз шаҳрванд Абдусамад Ҳоҷибоев барои оғоз накардани парвандаи ҷиноятӣ вобаста ба ин, ки гӯё номбурда аз Федератсияи Россия ба Ҷумҳурии Тоҷикистон бо роҳи дуздӣ воситаи нақлиёт ворид намудааст, 1000 доллари амрикоӣ гирифтаанд. Дар навбати дуюм бошад, бо ҳамин тарз 9000 доллари амрикоии Шуҳрат Исхаковро тасарруф намудаанд.
Оид ба ин ҳолат нисбат ба ҳар ду корманди милитсия бо моддаи 247 қисми 4 банди «б»-и Кодекси ҷиноятӣ (қаллобие, ки ба миқдори махсусан калон содир шудааст) парвандаи ҷиноятӣ оғоз гардида, тафтиши пешакӣ идома дорад.
ЗӮРОВАРӢ
Боздошти шахсе, ки даст ба ҷайби зани 39 - сола зад
Кормандони ШВКД-1 дар ноҳияи Шоҳмансур марди 29 - солаеро боздошт намуданд, ки 22 апрел дар кӯчаи Рӯдакии пойтахт даст ба ғорати зани 39 - сола задааст.
Бино ба гузориши сомонаи ВКД, боздоштшуда нимаи дуюми ҳамон рӯз ин бонуро латукӯб намуда, бо роҳи зӯроварӣ аз дохили ҳамёнаш 80 сомонӣ ва ду адад телефони мобилиро тасарруф намуда, аз ҷойи ҳодиса ғайб задааст. Зарари расондашуда дар пайи ин амал 4500 сомонӣ арзёбӣ мешавад.
Маъмурони милитсия баъд аз муроҷиати ин зан ба ШВКД-1 дар ноҳияи Шоҳмансур гумонбарро дастгир намуданд, ки ҳоло дар боздошт қарор дорад.
ДУЗДӢ
Ду марди қаблан судшуда боз ба курсии айбдорӣ нишастанд
Дар шаҳри Бӯстони вилояти Суғд ду нафари қаблан судшуда бо гумони дуздии масолеҳи сохтмонӣ ба даст афтоданд.
Дастгиршудаҳо масолеҳи сохтмониро аз хонаи истиқоматии марди 45 - сола, воқеъ дар кӯчаи Пушкини ҳамин шаҳр давоми рӯзҳои 22 - 25 апрел дуздидаанд, ки маблағи он 40 ҳазору 600 сомонӣ ҳисоб шудааст.
Тавре маркази матбуоти ВКД хабар медиҳад, гумонбарони ба содир намудани ҷинояти дуздӣ, мардони 31 ва 43 - сола буда, ҳар ду қаблан бо ҷурмҳои авбошӣ ва дуздӣ суд шудаанд.
Ҳоло аз рӯи ин ҳодиса парвандаи ҷиноятӣ бо моддаи 244 қисми 2 - и Кодекси ҷиноятӣ (дуздие, ки такроран аз ҷониби гурӯҳи шахсон бо маслиҳати пешакӣ содир шудааст) парвандаи ҷиноятӣ оғоз гардидааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 30.04.2020 №: 84 Мутолиа карданд: 1279
