порлумон
НОМГУЗОРӢ. ИҚДОМИ МУҲИМ ДАР РОҲИ ХУДШИНОСӢ
Маҷлиси намояндагони Маҷлиси Олии Ҷумҳурии Тоҷикистон лоиҳаи қонунеро баррасӣ ва тасвиб кард, ки он шеваи номгузорӣ дар доираи феҳристи номҳои миллии тоҷикиро танзим хоҳад кард.
Музаффар Ашӯриён, вазири адлия, зимни баррасии лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи бақайдгирии давлатии асноди ҳолати шаҳрвандӣ» дар Маҷлиси намояндагон иброз дошт, ки он дар иртибот ба иҷрои банди 14 нақшаи чорабиниҳо оид ба иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки зимни мулоқот бо намояндагони аҳли зиё – маориф, илм, адаб ва фарҳанг ба муносибати Рӯзи забони давлатии Ҷумҳурии Тоҷикистон 4 сентябри соли 2019 баён доштаанд, бо тартиби ҳуқуқи ташаббуси қонунгузорӣ аз тарафи Ҳукумати Ҷумҳурии Тоҷикистон пешниҳод гардидааст.
Мавсуф ёдрас шуд, ки Пешвои муаззами миллат таъкид намуданд, эҳё кардани номҳои миллии тоҷикӣ ва ба танзим даровардани онҳо яке аз масъалаҳои мубрами сиёсати забонии мо мебошад. Дар хотир бояд дошт, ки асолати миллӣ доштани номи инсон омили нерумандии ташаккули шахсият ва эҳсоси худогоҳию хештаншиносии ӯ ба шумор меравад.
Тибқи лоиҳа минбаъд насаби кӯдак дар вақти бақайдгирии давлатии таваллуд бо насаби падар ё модар ва ё насаби аз номи падар ё номи падари падар ташаккулёфта бе истифодаи пасвандҳои – ов, - ова, - ев, - ева сабт карда мешавад. Мутобиқи тағйироти мазкур ҳангоми ташаккул ёфтани насаби шахс пасвандҳои –пур, -дӯхт, низ дар баробари пасвандҳои –ӣ, -зод, -зода, -он, -ён, -иён, -ёр, -иё, -фар истифода мешаванд. Номи падар бо иловаи пасвандҳои ташаккулдиҳандаи –зод, -зода, -ёр, -иё, -фар, -фур, -дӯхт ва ё бе иловаи чунин пасвандҳо ташаккул меёбад. Дар номи падар истифодаи пасвандҳои - овна, - евна, - ович, - евич манъ карда мешавад. Дар сурати гуногун будани миллати падару модар насаби кӯдак бо мувофиқаи онҳо бо насаби падар ё модар тибқи талаботи қисми 11 – и моддаи 20 сабт мешавад.
Вазири адлия зикр кард, ки моддаи 20 – и қонуни мазкур аз 11 қисм иборат буда, 10 қисми он ба шаҳрвандони ҷумҳурӣ, ки миллаташон тоҷик мебошад, тааллуқ дошта, қисми 11 – ум ва 12 – уми иловашаванда тартиби номгузории кӯдак ва ташаккули насаби ӯро дар сурати гуногун будани миллати падару модар ба танзим медарорад ва, ҳамчунин, меъёри истисноӣ ва кафолатӣ нисбат ба намояндагони ақаллиятҳои миллӣ, ки шаҳрвандони Ҷумҳурии Тоҷикистон мебошанд, пешбинӣ шудааст.
Мунаввари САФАР,
«Ҷумҳурият»
Баёни ақида (0) Санаи нашр: 04.05.2020 №: 86 Мутолиа карданд: 7662
