ҳуқуқ
ҶИНОЯТ ва ҶАЗО
РИШВАСИТОНӢ
Боздошти корманди андоз бо 21000 сомонӣ
Мутахассиси пешбари нозироти андоз дар ноҳияи Зафаробод Мирзобек Муродов ҳангоми гирифтани 21000 сомонӣ ҳамчун ришва аз сӯи кормандони Агентии назорати давлатии молиявӣ ва мубориза бо коррупсия дастгир шуд.
Дар ин бора маркази матуботи агентӣ хабар дод. Тибқи иттилои манбаъ, номбурда 22 феврали соли ҷорӣ аз роҳбари як хоҷагии деҳқонӣ шаҳрванд «Б» барои ба манфиати ҳамин хоҷагӣ ҳал намудани санҷиши андоз 21000 сомонӣ талаб намудааст. Худи ҳамон рӯз дар натиҷаи гузарондани як амалиёт М. Мурдов ҳангоми гирифтани маблағи нишондодашуда боздошт гардидааст.
Сомонаи агентӣ менависад, ки ҳоло нисбат ба М. Муродов бо моддаи 247 қисми 2 бандҳои «в, г» - и Кодекси ҷиноятӣ (қаллобие, ки бо расондани зарари ҷиддӣ ба шаҳрванд ва бо истифода аз мақоми хизматӣ содир шудааст) парвандаи ҷиноятӣ оғоз гардида, тафтиши пешакӣ идома дорад.
ҚАЛЛОБӢ
Парвандаи ҷиноятӣ алайҳи шахси фиребгар
Маркази матбуоти Вазорати корҳои дохилӣ дар асоси шикояти ду сокини пойтахт аз ошкор шудани ҳодисаи қаллобӣ хабар дод, ки дар содир кардани он марди 38 - солаи сокини кӯчаи Ҳисори шаҳри Душанбе гумонбар мешавад.
Кормандони ШВКД-2 дар ноҳияи Сино дар асоси шикояти шаҳрвандон муайян карданд, ки номбурда моҳи ноябри соли 2019 ба боварии марди 28 - солаи сокини пойтахт даромада, мошини тамғаи «Лексус ЛС-460» - ашро ба маблағи 33 ҳазору 500 доллари амрикоӣ нархгузорӣ карда гирифта, то ҳол маблағашро надодааст. Гумонбар бо ҳамин усул аз сокини дигари шаҳр «Мерседес-Бенс» - ро гирифта пулашро барнагардондааст.
Дар робита ба ин ҳолатҳо, нисбат ба гумонбаршаванда парвандаи ҷиноятӣ оғоз шуда, тафтишот давом дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 04.05.2020 №: 86 Мутолиа карданд: 1228
