фарҳанг
САРБОЗ. ПОРАЕ АЗ ЗИНДАГИНОМАИ РАҶАБ ВОҲИДОВ
Раҷаб Воҳидов оли 1920 дар деҳаи Сангтӯдаи ноҳияи Данғара ба дунё омадааст. Солҳои қаҳтӣ ба деҳаи Оқсӯи ноҳия меояд ва соли 1925 ба водии Вахш кӯч мебандад. Онҳо аз аввалин бунёдгарони сохти колхозӣ дар ҳамин минтақа маҳсуб меёбанд. Ҳамин тавр, Раҷабалӣ мактаби миёнаро дар ҳамин колхоз ба итмом мерасонад. Омӯзгорони мактаб донишу лаёқати ӯро ба назар гирифта, ба омӯзишгоҳи муаллимтайёркунии шаҳри Қӯрғонтеппа (ҳозира Бохтар)мефиристанд. Баъди хатми омӯзишгоҳ бо роҳхати Вазорати маориф ба яке аз деҳаҳои дурдасти Кангурт ба кор меравад.
Баъди шаш моҳи кор Ҷанги Бузурги Ватанӣ оғоз ёфт. Ӯ яке аз аввалинҳо шуда, ба ҷанг рафт.
Раҷабалӣ Воҳидов барои хизматҳои шоёнаш ба дарёфти унвони «Шаҳрванди фахрии Киев» мушарраф гашт. Корнамоиҳояш бо орденҳои «Шараф» дараҷаи сеюм, «Револютсияи Октябр», ду «Нишони фахрӣ» дараҷаи якум ва бисёр медалҳо қадрдонӣ шуд.
Охирҳои соли 1944 баъди чандин бор ҷароҳатҳои вазнин бардоштан ба Ватан бармегардад. Ӯро чун шахси корозмуда ба комиссариати ҳарбии шаҳри Қӯрғонтеппа даъват менамоянд. Ӯ ҳамчунин, дар ШВКД- ҳои шаҳри Душанбе, ноҳияҳои Абдураҳмони Ҷомӣ ва Шаҳритуз кор кардааст.
Захмҳои ҷанг ӯро ором намегузоштанд. Бинобар ин, ба хулосае меояд, ки корро дар истеҳсолот давом диҳад. Сарварии корхонаҳои хиштбарории шаҳрҳои ҳозираи Бохтар ва Левакантро бар зимма дошт. Сипас, шодравонро роҳбари идораи сохтмони байниколхозии Қӯрғонтеппа ва Вахш таъйин карданд. Дар ин давра ба гирифтнаи нишони “Сохтмончии дараҷаи якуми СССР” мушарраф гардид.
Мавсуф раиси колхози ба номи Максим Горкийи собиқ шаҳри Қӯрғонтеппа таъйин шуд. Баъди панҷ соли кор боз ӯро ба идораи сохтмони шаҳр даъват намуданд. Раҷабалӣ Воҳидов то охири ҳаёт ҳамзамон раиси шӯрои ветеранҳои ҷангу меҳнати шаҳри Қӯрғонтеппа буд. Меҳнатҳои шоёнашро ба инобат гирифта, кӯчаеро, ки дар он корхонаи хиштбарорӣ сохта буд, ба номаш гузоштанд ва ҳамчун рамзи эҳтирому сипос нимпайкараашро он ҷо сохтанд.
Зокир ҲАСАН, “Ҷумҳурият”,
Маҳмадалӣ АКРАМОВ, рӯзноманигор
Баёни ақида (0) Санаи нашр: 13.05.2020 №: 91 Мутолиа карданд: 647
