маориф
ТАРБИЯ. ЗИЁИИ ҲАҚИҚӢ МАСЪУЛИЯТИ БЕШТАР ДОРАД
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо фаъолияти ҳамарӯзаи пурсамараи хеш ба нафъи халқу Ватан ва ояндаи дурахшони насли навраси миллат устуворона қадам мегузоранд ва мардуми шарафманди тоҷикро беш аз пеш ба ватандӯстию худогоҳӣ, омӯзиши маърифати баланди илмию фаросати давлатдорӣ ва ободкорию созандагӣ ҳидоят месозанд.
Сарвари давлат чун омили расидан ба чунин ҳадафҳои неку дурандешона масъалаи рушди соҳаҳои илму маорифро яке аз самтҳои хеле муҳиму афзалиятноки сиёсати давлатӣ дониста, барои пешрафти онҳо шароиту имкониятҳои заруриро фароҳам меоранд, ки ин бесабаб нест. Зеро пешрафти давлату миллат ба густариши соҳаи маориф ва беҳбуд бахшидани заминаҳои моддиву маънавии таълиму тарбияи насли наврас вобастагии зич дорад. Яъне, парвариши насли солиму бофарҳанг ва эҷодкору донишманд асоси пешрафти давлат, ободии ҷомеа ва боиси зиндагии шоистаи мардум маҳсуб мешавад.
Гузашта аз ин, Пешвои муаззами миллат зимни мулоқот бо зиёиёни кишвар бо назардошти аҳамияти масъала оид ба баланд бардоштани нақши падару модар дар таълиму тарбияи фарзанд ибрози андеша карда, масъулинро вазифадор намуданд, ки барои татбиқи пурраи нишондодҳои Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» ва Консепсияи миллии тарбия чораҳои таъсирбахшу зарурӣ андешида шаванд.
Аз суханронӣ ва таъкидҳои Роҳбари давлат бармеояд, ки зиёиён бояд равшангари роҳи ҷомеа бошанд, чун тарбияи ватандӯстии мардум, бахусус, ба ҷодаи дуруст раҳнамун сохтани насли наврасу ҷавонон, ба зиммаи онҳост. Бояд гуфт, ки ҳадафи асосии тарбия расидани давлату миллат ба пешравию муваффақиятҳо мебошад ва дар ин самт дар ҳама давру замонҳо аҳамият ва мақоми соҳаи маориф дар рушди ҷомеа муассир буд ва мемонад.
Бинобар ин, барои баланд бардоштани обрӯй ва мавқеи омӯзгор дар ҷомеа, моро лозим меояд, ки дар асоси сиёсати маорифпаваронаи Пешвои миллат, бо дасту дилу нияти пок ва поквиҷдононаву содиқона дар таълиму тарбияи насли ояндасози миллат ва ҷавонон бо як масъулияти баланди ватандорӣ саҳм бигирем. Ҳар як омӯзгор чун зиёии ҳақиқӣ, бояд талош варзад, ки эҳтироми фарҳангу маънавиёти миллӣ ва забонро ба ҷо оварад, густариш диҳад ва ба таври арзанда миёни наврасону ҷавонон муаррифӣ намояд.
Муродгул САЪДУЛЛОЕВА, мудири бахши маркази дарёфт ва рушди истеъдодҳои ноҳияи Данғара, унвонҷӯи ДДД
Баёни ақида (0) Санаи нашр: 15.05.2020 №: 93 Мутолиа карданд: 2077
