фарҳанг
РӮЗГОРЕ БАРОИ ИБРАТ
Ҳоким Амон. Ин шахси наҷиб ба кулли омӯзгорони ноҳияи Кӯшониён шиносу муътабар аст. Вай марде буд тору пудаш сиришта аз некиву накукорӣ. Маъракаоро, хушсуҳбат, бар замми хушчақчақӣ, ширингуфторӣ, чарбзабонӣ кӯшиш менамуд, ки ба атрофиён аз андарзҳои ниёгонамон вобаста ба ҳолату рӯҳия ва кайфияти мусоҳибон пандҳои судманд бидиҳад.
Омӯзгор Ҳоким Амонро аз солҳои ҳафтодуми асри ХХ хеле хуб мешиносам. Дар муассисаи таҳсилоти миёнаи умумии рақами 1 фаъолият доштем. Устод на танҳо омӯзгори пешқадам ва навҷӯ, инчунин, ровии хушсадо, ҳунарманди мумтоз ва деҳқони асил ҳам буд. Чӣ тавре ки мегӯянд, аз даҳ ангушташ ҳунар мерехт. Ба корафтодагон коромӯз буд ва бо маслиҳатҳои судмандаш онҳоро хушнуд мекард. Дар мактаб ба шогирдон аз таърих сабақ медод. Шогирдонаш ҳар сол дар олимпиадаҳои фаннӣ иштирок карда, ҷойҳои ифтихориро сазовор мегаштанд. Аз соли 1975 ҳар сол аз рӯи асари безаволи «Тоҷикон» - и аллома Бобоҷон Ғафуров конфронс созмон медод. Ба ин васила, хонандагон бо таърихи куҳани миллати хеш шинос шуда, ҳисси ватандӯстии худро баланд мебардоштанд.
Як лаҳза ҳеҷ аз ёди мардуми Кӯшониён намеравад. 1100 – солагии таъсиси давлати Сомониён таҷлил мешуд. Мактаби мо намоиши театрикунондашудаи лаҳзаи ба сари қудрат омадани шоҳ Исмоили Сомониро бояд нишон медоду шоҳ Исмоили Сомонӣ савори аспи сапед бо шаҳомати бузург аз назди минбар мегузашт. Устод Ҳоким Амон суханони Исмоили Сомониро аз ёд карда, ба саҳна мувофиқ карда буд. Танҳо дарёфти аспи сапед ҳал ношуда монд. Ӯ ба кӯҳи Тераклӣ рафта, аз як шиноси чӯпонаш чунин аспро пайдо намуд. Рӯзи намоиш аспсавор бо суханони мутантан, либосҳои шоҳона, тоҷ бар сар аз назди минбар гузаштани ӯ дар нақши шоҳ Исмоили Сомонӣ то ҳол аз ёди мардум зудуда нагардидааст. Ин лаҳзаро бо кафкӯбиҳои бардавом истиқбол намуда буданд.
Муаллим Ҳоким Амон шогирдони зиёдеро тарбия намуда ба камол расондааст. Дар ҳар мактаби ноҳия дастпарваронаш аз фанни таърих ва ҳуқуқ дарс мегӯянд. Хабари даргузашти ҳамкори азизамон мо – омӯзгорону шогирдонро сахт андуҳгин ва мутаассир намуд. Танҳо худро бо он тасалло дода мегуфтем, ки умри устод Ҳоким Амон зоеъ нарафт. Ӯ бо накуномиву росткорӣ, ёрӣ ба ашхоси эҳтиёҷманд, таълиму тарбияи ҳамида дар қалби шогирдон, ҳамкасбон, ҳамдеҳагон то абад ҷовид хоҳад монд. Ба қавли шайх Саъдӣ:
Номи неку гар бимонад з-одамӣ,
Беҳ, к-аз ӯ монад саройи зарнисор.
Қурбон МАДАЛИЕВ, «Ҷумҳурият»,
Ҳ. ҲОҶӢ, омӯзгори собиқадори МТМУ № 1,
ноҳияи Кӯшониён
Баёни ақида (0) Санаи нашр: 19.05.2020 №: 95 Мутолиа карданд: 532
