иқтисод
«ХУҶАНД - АГРО». СОДИРОТИ МАҲСУЛОТ БА ТАРАБХОНАҲОИ АВРУПО
Раиси вилояти Суғд Раҷаббой Аҳмадзода ва раиси шаҳри Хуҷанд Маъруф Муҳаммадзода бо фаъолияти корхонаи коркарди меваю сабзавоти ҶДММ “Хуҷанд - Агро”, ки соли равон дар минтақаи саноатии шимолу шарқии шаҳри Хуҷанд бунёд ёфт, шинос шуданд.
Маъмури Юсуфзод, котиби матбуотии дастгоҳи раиси шаҳр, зимни суҳбати телефонӣ ба хабарнигори «Ҷумҳурият» гуфт, ки дар корхона бо истифода аз технологияи муосири истеҳсоли Россия, Чин, Украина ва Олмон асосан коркарди меваю сабзавот, аз ҷумла сабзӣ, лаблабу, карам, пиёз, каду, сирпиёз, се намуди кабудӣ, картошка, лимӯ ва себ, ба роҳ монда шудааст. Корхона иқтидор дорад, ки дар як шабонарӯз 10 - 12 тонна меваю сабзавоти тару тозаро коркард намояд.
Ба гуфтаи ӯ, корхона маҳсулоти кишоварзиро аз хоҷагиҳои деҳқонии вилоятҳои Суғду Хатлон ба тариқи яклухт дастрас, дар се марҳила бо технологияи муосир тоза ва дар ҳарорати 100 дараҷа хушк мекунад. Маҳсулоти тайёр мувофиқ ба талаботи бозори ҷаҳонӣ бандубаст карда мешавад.
- Айни замон дар корхона пиёзи истеҳсоли вилояти Хатлон мавриди коркард қарор дорад ва нақша аст, ки ба хориҷи кишвар содирот шавад, - гуфт Маъмури Юсуфзод.
Маҳсулоти истеҳсолшудаи корхона, ки аз ҷиҳати экологӣ тоза аст, асосан ба хориҷи кишвар, аз ҷумла Россия, Қазоқистон, Украина ва кишварҳои Аврупо содирот мешавад. Харидорони маҳсулоти корхона ширкатҳои маъруфи «Gallina Blanca», «Доширак», «Маги» ва як қатор тарабхонаҳои брендии Россияву мамолики Аврупо мебошанд, ки онро асосан барои омода кардани хӯрокҳои зудтайёр истифода мебаранд.
Дар озмоишгоҳи корхона, ки бо дастгоҳу асбоби муосир муҷаҳҳаз мебошад, таркиби меваю сабзавотро ҳаматарафа месанҷанд. Дар раванди истеҳсолот ягон навъи маводи химиявӣ истифода намешавад ва аз ҳамин лиҳоз дар дохилу хориҷи ҷумҳурӣ ба маҳсулоти корхона талабот зиёд аст.
Раҷаббой Аҳмадзода ба роҳбари корхона дастур дод, ки шумораи кормандонро зиёд, бо истифода аз фаровонии ҳосили имсола аз тамоми минтақаҳои кишвар маҳсулоти хомро ҷамъоварӣ ва барои коркард захира намоянд.
Кароматулло АТО,
«Ҷумҳурият»
Баёни ақида (0) Санаи нашр: 04.06.2020 №: 104 Мутолиа карданд: 1003
