иқтисод
БМТ. ПАНДЕМИЯ ВА ТАДБИРҲО ОИД БА АФЗОИШИ ПАРДОХТҲОИ ҒАЙРИНАҚДӢ
Вобаста ба вазъи паҳншавии коронавирус дар бисёр кишварҳои ҷаҳон ҳиссаи пардохти ғайринақдӣ метавонад ба таври назаррас афзоиш ёбад, - пешгӯӣ кардаанд мутахассисон. Масалан, аз сабаби паҳншавии сироят русҳо ҳарчи бештар пардохтҳои ғайринақдиро интихоб мекунанд. Ду омил ба ин мусоидат кард: эътимоди истеъмолкунандагон ба пардохт тавассути воситаҳои бетамос дар ҳолати пандемия ва афзоиши фармоиш дар интернет. Мувофиқи ҳисобҳои охири Бонки марказии Федератсияи Россия, ҳиссаи пардохтҳои ғайринақдӣ дар савдои чакана, аллакай 63 фоизро ташкил медиҳад.
Дар Ҷумҳурии Тоҷикистон, феълан, таносуби амалиёти нақдӣ ва ғайринақдӣ 91,3 ба 8,7 фоизро ташкил дода, тибқи арзёбии коршиносони ватанӣ ҳиссаи пардохтҳои ғайринақдӣ дар ҳоли зиёдшавӣ қарор дорад. Бино ба гуфтаи онҳо, илова ба таъсири коронавирус, солҳои оянда ҳиссаи пардохтҳои ғайринақдӣ бинобар рушди низоми пардохтҳои бетамос афзоиш хоҳад ёфт. Алҳол дар марказҳои савдову мағозаҳои калон POS-терминалҳо барои қабули кортҳои пардохтӣ мавҷуданд. Ҳамёнҳои электронӣ, интернет - бонкинг, бонкдории мобилӣ ва интиқоли фаромарзии маблағҳо ба ҳамёнҳои электронӣ ба рушди тиҷорати онлайнӣ таъсири мусбат мерасонанд. Инчунин, амалиёти “Cash back”, яъне баргардондани маблағи муайян ба муштарӣ дар мавриди пардохти ғайринақдӣ, аксияҳои бурднок, бонусҳо, пешниҳоди фоиз ба бақияи суратҳисоби кортҳои пардохтӣ саҳми худро хоҳанд гузошт.
Дар самти рушди пардохтҳои байналмилалӣ низоми пардохтии байналмилалии Visa меъёри ҳаҷми маблағи амалиётҳоеро, ки тавассути кортҳои бетамос, бе ворид намудани рамзи PIN (Personal identification number – рақами мушаххаскунандаи фардӣ) анҷом дода мешуданд, дар ҳаҷми 500 сомонӣ муқаррар намуд. Яъне, дорандагони кортҳои Visa дар нуқтаҳои савдою хизматрасонӣ бе вориди рамзи PIN ба маблағи то 500 сомонӣ харид карда метавонанд.
Бонки миллӣ бо мақсади дастгирии низоми бонкӣ ташкилотҳои қарзии молиявиро аз пардохти ҳаққи хизматрасонӣ барои ҳисоббаробаркуниҳои байнибонкӣ тавассути Низоми автоматишудаи байнибонкии интиқоли маблағҳо ва Низоми автоматишудаи бонкӣ амалишаванда, инчунин иштирок дар Низоми пардохтии миллии “Корти миллӣ” ва низоми пардохтии байналмилалии VISA дар моҳҳои апрел – августи соли ҷорӣ озод намуд. Ин тадбир ба бонкҳо имкон медиҳад, хизматрасонии мувофиқро ба мизоҷон ташкил кунанд ва ҳиссаи пардохтҳои ғайринақдӣ зиёд карда шавад.
Шаҳноз ҚУРБОН, «Ҷумҳурият»
Баёни ақида (0) Санаи нашр: 04.06.2020 №: 104 Мутолиа карданд: 617
