фарҳанг
КОРДСОЗӢ. ҲУНАР ДАР ЧАШМИ КОРДОН АСТ
Ҳунари кордсозӣ дар байни мардуми мо собиқаи дерина дорад. То солҳои 80-уми асри гузашта мардони тоҷик дар камарбандашон ҳатман корд доштанд. Корд ҳангоми буридани ин ё он бутта, гиёҳи шифобахш, вақти хӯрокхӯрӣ, забҳи чорво ё дучор омадани хазандаю ҳайвонҳои гуногун дар саҳро ҳамчун аслиҳаи муҳимтарин хидмат мекард.
Имрӯз ҳам ҳунари кордсозиро мардони кордон дар шаҳру ноҳияҳои кишвар зинда медоранд. Неъмат Қарабоев, сокини шаҳри Истаравшан, аз зумраи устоҳои чирадастест, ки аз 12 - солагӣ бо сохтани корд машғул аст.
- Ин касб барои мо меросӣ буда, падар ва бобокалонам ҳам онро месохтанд. Нахуст чаҳор сол ман фақат рафти кордсозиро назорат мекардам. Падарам мегуфт, бояд ҳар як кор аввал дар майнаи сарат нақш бандад, пухта расад, дар чунин ҳолат маҳсулоти ту зебову босифат офарида мешавад. Бисёриҳо гумон доранд, ки усторо дастонаш усто мекунанд, аммо фаромӯш макун, асли ҳунармандии ту чашмони туст. Чашм бояд ҳамабину кордону завқманд бошад, - нақл мекунад ҳамсуҳбати мо.
Корд ҳамчун асбоби рӯзгор, асосан, аз пӯлод сохта мешавад, аммо баъзе аз устоҳои тоҷик онро аз оҳан месозанд, ки сифаташ назар ба пӯлод пастар мебошад. Мавриди сохтани корд аз ду навъи пӯлод истифода бурда мешавад, пӯлоди сафедро барои кордҳои армуғонию рӯзгордорӣ ва пӯлоди сиёҳро, ки сахту бурротар аст, барои кордҳои шикорӣ ба кор мебаранд. Дар кордсозӣ нақшҳои ҳаккокишудаи танаву дастаи асбоб нақши назарас доранд. Одатан тасвири моҳу ситора ба чашм мерасад.
Неъмат Қарабоев аз он изҳори нигаронӣ мекунад, ки имрӯзҳо талабот ба корд коҳиш ёфтааст. Мардум ба кордҳои арзони чинӣ мароқи бештар доранд. Аммо аксари онҳо баъди як моҳи истифодашавӣ корношоям шуда, дастаи пластикӣ, баъзе вақт худи филиз мешиканад. Чунин кордҳоро барои таъмиру тезкунӣ бисёр овардаанд, дар устохонаи мо низ бисёр ҳастанд. Афсӯс, ки чунин кордҳоро ба чарх расондед, мерезанд.
Нигина РАҲМОН, «Ҷумҳурият»
Баёни ақида (0) Санаи нашр: 09.05.2020 №: 107 Мутолиа карданд: 1268
