фарҳанг
РӮЗГОРЕ БАРОИ ИБРАТ
Дар кишварамон, ки охири моҳи апрел COVID-19 хуруҷ намуд, дар 85 беморхона зиёда аз 7500 табиб ва 25 ҳазор корманди миёнаи тиб баҳри пешгирии паҳншавии он ва табобати гирифторон талош доранд. Ҳукумати ҷумҳурӣ ҳама воситаҳои зарурии модию техникиро фароҳам овардааст, то ки дар ин мубориза муваффақ бошанд. Шифо ёфтани қариб 60 дарсади мубталоён далели он аст, ки пайравони Сино дар ин ҷода муваффақанд. Вале ин пирӯзӣ қурбониҳо низ дорад.
21 майи соли ҷорӣ хабари марги табиби шинохта, мудири кафедраи ҷарроҳии кӯдаконаи Донишгоҳи давлатии тиббии Тоҷикистон ба номи Абуалӣ ибни Сино (ҷарроҳи Маркази миллии тиббии Ҷумҳурии Тоҷикистон «Шифобахш») Шералӣ Султонов садҳо ҳамкорону шогирдон ва нафаронеро, ки аз дасти сабуки ӯ шифо ёфтаанд, андуҳгин кард. Ӯ то нафаси вопасин барои табобати кӯдакони маъсуми бемор ҷонбозӣ кард.
Шералӣ Султонов соли 1996 Донишгоҳи давлатии тиббии Тоҷикистонро хатм намуда, ҳамчун ҷарроҳи кӯдакон дар шуъбаи септикии ММТ «Шифобахш» ба фаъолият пардохт. Солҳои 2000 - 2007 мудири шуъбаи ҷарроҳии таъҷилии кӯдаконаи ҳамин муассиса буда, ҳамзамон, аспиранти кафедраи ҷарроҳии кӯдаконаи Донишгоҳи давлатии тиббӣ гашт. Солҳои 2007 - 2010 мудири шуъбаи узвҳои қафаси сина ва шиками кӯдаконаи ММТ «Шифобахш» ва докторанти ДДТТ буд. То нафаси охирин дар донишгоҳи номбурда сарварии кафедраи ҷарроҳии кӯдаконаро ба уҳда дошт.
Муаллифи чандин таълифоти илмӣ, пешниҳоди навоварона ва кашфиёт мебошад.
Рисолаҳои номзадӣ ва докториашро дар шӯрои диссертатсионии Маркази илмии саломатии кӯдакони Донишкадаи педиатрии ба номи Сперанскийи шаҳри Москва дифоъ кардааст. Иштирокчии чандин форуму конгресси байналмилалӣ оид ба масоили ҷарроҳӣ, педиатрия ва анестезиология, инчунин, узви Ҷамъияти ҷарроҳон, анестезиологҳои Ҷумҳурии Тоҷикистон, Ассотсиатсияи ҷарроҳон ва анестезиологҳои кӯдаконаи Федератсияи Россия буд.
Ҷарроҳи номӣ Шералӣ Султонов чун ихтироъкор усулҳои нави ҷарроҳии кӯдаконаро пешниҳод намудааст. Маҳз дар натиҷаи бозёфтҳои илмии ӯ дар ҷумҳурӣ дар соҳаи ҷарроҳии кӯдакона бори аввал тарзи ҷадид - эндовидеоҷарроҳии кӯррӯдаи шадид, зиёдшавии шадиди равған дар ғадуди зери меъдаву талха, маҳкамшавии рӯдаҳо, ногузароиши шадиди рӯда, чураи шикам, носури эхинококки узвҳо, носур, тобхӯрии тухмдон дар духтарон, бемории варикоселӣ ва дигарҳо ба роҳ монда шуд. Умдатарин навоварии ӯ усули ташхису табобати пайванди косу рон дар кӯдакони гирифтори остеомиелити шадиди гематогенӣ мебошад.
Ӯ муаллифи 3 китоби дарсӣ, 2 монография, 20 дастури таълимию методӣ, мақолаҳои зиёди илмӣ, 10 ихтироот ва 20 пешниҳоди навоварӣ мебошад. Фаъолияти шоистаи илмӣ ва амалӣ, дониши амиқу маҳорати волои ӯ барои наҷоти ҷони беморони хурдсол, ҳамчунин, сифатҳои ҳамидаи инсониаш кайҳо мояи ибрату пайравӣ гаштааст. Дар тӯли чоряк аср ҳазорҳо кӯдакро аз беморӣ вораҳонда, ба по гузоштааст, шогирдони зиёдеро дар роҳи хизмати содиқона ба халқ раҳнамоӣ кардааст.
Лашкар ШАРИФЗОДА,
«Ҷумҳурият»
Баёни ақида (0) Санаи нашр: 09.06.2020 №: 107 Мутолиа карданд: 1087
