фарҳанг
РУБРИКАИ АДАБӢ – БОЗЁФТИ САҲИФАИ «ШОМИ ШАНБЕ»
Рӯзномаи «Ҷумҳурият» дар солҳои соҳибистиқлолӣ бо матолиби пурмуҳтавою хондании худ пешгоми нашрияҳои ҷумҳуриамон гардид. Эҷодкорӣ, ҷустуҷӯю ковишҳои мунтазами кормандони он, тахайюли рангин ва сатҳи баланди ҷаҳонбинию тафаккури рӯзноманигорони нашрия боиси ба майдон омадани гӯшаю саҳифаҳои шавқовар ва ҷолиб шудааст.
Дар радифи дигар гӯшаҳои пурмуҳтавои рӯзнома саҳифаи пурғунҷоиши иттилоотӣ– фароғатии «Шоми шанбе» бо пешниҳоди хабарҳои ҷолиби хурд-хурд, вале дорои арқому далоили тозаву ноб ва барои хонандаи нашрия ногаҳонӣ хеле саривақтӣ ва хонданбоб маҳсуб меёбад. Бахусус, бароям чун эҷодкор, матолиб - муаммоҳое, ки дар гӯшаҳои «Фурӯғи субҳи доноӣ китоб аст» ва «Интеллект +» ба табъ мерасанд, бағоят мақбулу писанд мебошанд. Бе муболиға, маводе, ки дар гӯшаи «Фурӯғи субҳи доноӣ китоб аст» пешкаши хонандаи закию донишманд мегардад, басо рангин буда, шахсро ба фикр кардан водор месозад. Дар пайдо кардани муаллифони матолиби ин гӯша танҳо фарде пирӯзу дастболо мегардад, ки пурхондаву бофарҳанг ва мутолиаи осори бадеӣ (чи назмию чи насрӣ) шуғли ҳаррӯзаи ӯ қарор гирифта бошад.
Бе ҳеҷ шакку тардид, таъсису пешниҳоди чунин гӯша бо пораҳо аз асарҳои назмӣ ва насрӣ аз ҷониби масъули рубрикаи мазкур Зулола Бобораҷабова бозёфти эҷодии нашрияи бонуфузи ҷумҳурӣ – рӯзномаи «Ҷумҳурият» мебошад. Воқеан, ба Зулола муяссар гардидааст, ки дар заминаи андешаю ҷустуҷӯ ва тахайюли рангин гӯшаи дӯстдоштании хонандагони нашрияро ташкил намояд.
Матнҳои пешниҳодшуда бо рангорангию пурмазмунӣ ва дарёфти бамаврид аз нависандагону шоирони тоҷик (чи классикию чи муосир) таваҷҷуҳи ҳаводорону муштоқони ин гӯшаро бармеангезад. Муҳимияти гӯша дар он зоҳир мегардад, ки шахси бофарҳангро зуд ба фикр ва ҷустуҷӯю «майна об кардан» мувоҷеҳ месозад. Ана ин шева, воқеан, «кашф» - и Зулола аст.
Гузашта аз ин, масъулон аз рӯйи мақоли «Ҳар заҳматеро подошест» амал намуда, ғолибони доною закиро ҳавасманд мегардонанд, ки ин паҳлуи дигари амали некбинонаи онҳо мебошад.
Бигузор, сафи ҳаводорону мухлисон ва ташнагони осори бадеъ ба шарофати рубрикаи «Фурӯғи субҳи доноӣ китоб аст» зиёдтар гардад!
Шодӣ РАҶАБЗОД, адиб ва рӯзноманигор
Баёни ақида (0) Санаи нашр: 09.06.2020 №: 107 Мутолиа карданд: 630
