иқтисод
НОҲИЯИ ДАРВОЗ. ЭЪМОРИ ДУ КОРХОНАИ НАВ
Айни замон дар тамоми гӯшаю канори кишвари азизамон ба муносибати истиқболи сазовор аз 30 - солагии Истиқлолияти давлатии Ҷумҳурии Тоҷикистон корҳои созандагию бунёдгарӣ босуръат идома дорад. Дар ноҳияи Дарвоз низ дар баробари дигар иншооти ҷашнӣ ду корхонаи нав – коргоҳи тавлиди хокаи санги мармар ва парки инноватсионӣ эъмор мегардад.
- Солҳои рушди деҳот, сайёҳӣ ва ҳунарҳои мардумӣ эълон гардидани солҳои 2019 - 2021 аз ҷониби Президенти Ҷумҳурии Тоҷикистон муҳтарам Эмомалӣ Раҳмон иқдоми бузурге дар роҳи вусъат бахшидани рушди иқтисодию иҷтимоии кишвар ва саҳифаи наве дар муаррифии миллати тоҷик дар арсаи ҷаҳонӣ мебошад. Ҳамчунин, саноатикунонии босуръати мамлакатро Пешвои миллат дар Паёмашон ба Маҷлиси Олӣ чорумин ҳадафи стратегии миллӣ эълон карданд. Амалишавии ин мақсад рушди иқтисодию иҷтимоии давлатамонро устувортар гардонда, ҷиҳати бо ҷои кор таъмин кардани аҳолӣ мусоидат менамояд, - изҳор дошт Қосимӣ Диловар Абдулқодир, роҳбари дастгоҳи раиси ноҳия.
Тавре мавсуф иттилоъ дод, ташаббусу иқдомҳои Пешвои муаззами миллат муҳтарам Эмомалӣ Раҳмонро соҳибкорони ноҳияи Дарвоз низ хуш пазируфта, дар доираи омодагӣ ба Ҷашни 30 – солагии истиқлолияти давлатӣ ба таҳияи лоиҳаҳои аз ҷиҳати иқтисодӣ фоидаовар машғуланд. Ҳоло соҳибкорони меҳандӯстӣ ноҳия татбиқи ду лоиҳа – сохтмони корхонаи истеҳсоли хокаи санги мармар ва парки инноватсиониро оғоз намуда, кӯшиш доранд, ки онҳоро сари вақт ва бо сифати баланд амалӣ намоянд.
Корхонаи истеҳсоли хокаи санги мармар дар кони мармари деҳаи Вишхарви ноҳия эъмор гашта истодааст. Айни ҳол корҳо дар таҳкурсии иншоот бомаром идома дошта, масъулон кӯшиш доранд, ки ҳангоми ба кор даромадани корхона дар он бо истифода аз ашёи хоми маҳаллӣ истеҳсоли садҳо номгӯй маҳсулоти сохтмонии воридотивазкунандаро ба роҳ монанд.
Бунёдсозии парки инноватсионӣ бошад, дар мавзеи Дуробаки деҳоти Нулванд, дар масоҳати 1,5 гектар замини бекорхобида оғоз гардидааст. Он ба истиқболи Ҷашни умумимиллии 30 – солагии Истиқлолияти давлатӣ яке аз иншооти калонтарини бунёдшавандаи ноҳияи Дарвоз маҳсуб меёбад.
Парки мазкур аз чор коргоҳи истеҳсолӣ, бо хатҳои нави технологии пешрафтаи ҷаҳонӣ иборат аст. Корхона бо тарҳи муосир сохта шуда, истеҳсоли маҳсулот дар он бо истифода аз дастгоҳу таҷҳизоти пешрафтаи аврупоӣ ба роҳ монда мешавад. Дар коргоҳ аввал коркард ва истеҳсоли асали манотиқи кӯҳистон дар зарфҳои гуногуну зебо, бо бренди хос ва ҷавобгӯ ба талаботи байналмилалӣ роҳандозӣ хоҳад шуд.
Бояд гуфт, ки соҳаи занбӯриасалпарварии ноҳияи Дарвоз солҳои охир рушд карда, садҳо соҳибкори инфродӣ солҳо боз мунтазири чунин корхона буданд.
Коргоҳи дуюми парки инноватсионӣ ба истеҳсоли ниқобу дастпӯшак, либосу айнакҳои махсуси муҳофизатӣ барои табибон нигаронда шудааст, ки минбаъд метавонад муассисаҳои соҳаи тандурустии вилоятро бо чунин лавозимоти тиббӣ таъмин намояд. Дар коргоҳи сеюми корхона, ки сохтмони он низ бомаром идома дорад, тавлиди маҳлулҳои мухталифи антисептикӣ ва дигар маҳсулоти тиббӣ ба роҳ монда мешавад. Дар корхона навтарин таҷҳизоти технологӣ васлу насб мегардад.
Коргоҳи чоруми парк аз ду гармхонаи дарозиашон 48-метра иборат буда, барои парвариши сабзавот нигаронда шуда, қарор аст, ки дар чаҳор фасли сол сокинони шаҳру ноҳияҳои вилоятро бо сабзавоти тару тоза таъмин намояд. Ҳоло корҳои сохтмонӣ бо ҷалби беш аз 50 меъмору мутахассиси ноҳияҳои Дарвозу Ванҷ ва Ишкошим идома доранд. Бинокорон ният доранд, ки то моҳи августи соли ҷорӣ иншоотро мавриди истифода қарор диҳанд, ки метавонад садҳо сокини маҳаллиро бо ҷойи кори доимӣ ва маоши хуб таъмин намояд.
Гулнисои САЪДОНШО,
“Ҷумҳурият”
Баёни ақида (0) Санаи нашр: 09.06.2020 №: 107 Мутолиа карданд: 869
