фарҳанг
РӮ БА КИТОБ. МАЪРИФАТИ ҶАВОНОН БОЛО МЕГИРАД
Аз Сулаймон Бурҳонов, сармутахассиси бахши фарҳанги ноҳияи Ванҷ, пурсидем, ки омодагиҳо ба даврҳои минбаъдаи озмуни ҷумҳуриявии «Фурӯғи субҳи доноӣ китоб аст» дар кадом поя қарор дорад ва оё муассисаҳои фарҳангӣ, пеш аз ҳама китобхонаҳо, ба ин чорабинии муҳим омодагии комил дидаанд? Ҳамсуҳбатамон бо ифтихор ва қаноатмандӣ гуфт, ки вазифаҳои бамиёнгузоштаи Роҳбари давлатро кормандони мақомоти иҷроияи маҳаллии ҳокимияти давлатии ноҳияи Ванҷ ва дигар идораву муассисаҳои масъул, ҷамоатҳои деҳот, кормандони соҳаи маориф ва фарҳанг аз аввали сол то имрӯзҳо хуб ба ҷо оварда истодаанд. Имрӯзҳо даври аввали чорабинӣ дар ҳудуди деҳоти ба номи Муҳаммадулло Абдуллоев, Вотхуд, Язгулом, Ҷовидон ва Техарву Рованд ҷамъбаст мегардад. Пеш аз ҳама, бо мақсади ба таври оммавӣ ва дар сатҳи баланд баргузор намудани озмуни «Фурӯғи субҳи доноӣ китоб аст» саҳми кормандони шуъбаи маориф, бахшҳои фарҳанг, кор бо занону оила ва ҷавонону варзиш назаррас аст.
Собиқадори соҳаи фарҳанг аз он хусус изҳори хурсандӣ кард, ки сокинони ноҳияи Ванҷ аз ташаббус ва иқдомҳои шоистаи Пешвои муаззами миллат дар хусуси баланд бардоштани маънавиёти ҷомеаи кишвар, аз ҷумла роҳандозии озмуни «Фурӯғи субҳи доноӣ китоб аст», ки мардумро ба китобхонӣ шавқманд мегардонад, хеле шоду мамнун мебошанд.
Бо саъю талошҳои масъулони соҳа, дар маҷмӯъ, баҳри дар сатҳи баланд баргузор намудани ин чорабинии фарҳангӣ ва қавигардонии маънавиёти зеҳнии сокинон тамоми шароит ва имкониятҳо аз файзу баракати Истиқлолияти давлатии кишвар дар ноҳияи Ванҷ низ фароҳам оварда шудаанд. Баҳри исботи гуфтаҳои худ ҳамсуҳбатамон чунин далелҳо овард, ки ду сол муқаддам қасри муҳташами фарҳанг дар шаҳраки Рохарв бо иштироки Пешвои муаззами миллат мавриди истифода қарор гирифт. Қисми зиёди хонаҳои фарҳанг ва клубу китобхонаҳо дар ҳудуди шаш деҳот, аз ҷумла хонаҳои фарҳангӣ ва китобхонаҳои деҳаҳои Мотравн, Гишхун ва Ғӯмасту Лугад аз таъмири асосӣ бароварда шуда, ҳоло ҳамарӯза барои ҷавонону калонсолон дарҳои кушода доранд. Китобхонаҳо бо асарҳои адибони классику муосири ватанӣ, ба забонҳои тоҷикӣ, русӣ ва адабиётҳои халқҳои ҷаҳон ба қадри шароит ва имкониятҳо таъминанд. Муҳимаш он аст, ки озмуни «Фурӯғи субҳи доноӣ китоб аст» ягон маҳдудият надорад. Дар он садҳо нафар калонсолон, ҷавонон ва наврасони ноҳияи Ванҷ метавонанд бе мамоният ва мушкилот иштирок намоянд.
Муҳаммадзоиршо ШАРИФЗОДА, «Ҷумҳурият»,
Сироншоҳи ДИЛОВАР, рӯзноманигор
Баёни ақида (0) Санаи нашр: 13.06.2020 №: 109 Мутолиа карданд: 595
