иқтисод
ДАВЛАТДОРӢ. АГАР ИҚТИСОД РӮ БА РУШД АСТ...
Иқтисодиёт дар ҳаёти ҷомеа нақши калидӣ дошта, дар пешравии соҳаҳои мухталифи ҷомеа, бахусус сиёсат, фарҳанг, иҷтимоиёт, таъсири амиқи худро мерасонад. Бидуни рушди иқтисод ба музаффариятҳо ноил гардидан номумкин мебошад.
Ҷумҳурии Тоҷикистон ҳанӯз аз рӯзҳои аввали ба даст овардани истиқлолияти сиёсӣ рушду ташаккули соҳаи иқтисодиётро дар меҳвари таваҷҷуҳ қарор дод. Дар Конститутсияи Ҷумҳурии Тоҷикистон (моддаи 12) омадааст: “Асоси иқтисодиёти Тоҷикистонро шаклҳои гуногуни моликият ташкил медиҳанд. Давлат фаъолияти озоди иқтисодӣ, соҳибкорӣ, баробарҳуқуқӣ ва ҳифзи ҳуқуқии ҳамаи шаклҳои моликият, аз ҷумла моликияти хусусиро, кафолат медиҳад”. Маҳз муҳимияти ин соҳа дар ҷомеа мебошад, ки ҳар сол дар паёмҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нақши калидии соҳаи иқтисодиёт дар рушди мамлакат таъкид мегардад.
Ҳадаф аз рушди иқтисод баланд бардоштани сатҳи зиндагии мардум мебошад. Муҳтавои Паёми навини Сарвари давлат муҳтарам Эмомалӣ Раҳмонро низ ҳифзи дастовардҳои истиқлолияту ваҳдат ва рушди иқтисоди миллӣ ташкил медиҳанд. Сарвари давлат татбиқи чорабиниҳои “Стратегияи миллии рушди Ҷумҳурии Тоҷикистон барои давраи то соли 2030” ва “Барномаи миёнамуҳлати рушди Ҷумҳурии Тоҷикистон барои солҳои 2016 -2020” - ро калиди расидан ба ҳадафи олӣ - баланд бардоштани сатҳу сифати зиндагии мардуми кишварамон арзёбӣ намуданд. Дар ин росто, зикр гардид, ки барои пешравии бештар ба ҷанбаҳои сифатии рушди иқтисоди миллӣ, тақвияти неруи инсонӣ, бо истифода аз технологияҳои муосир ва ҷорӣ намудани инноватсия вусъат додани истеҳсоли маҳсулоти ниҳоӣ, баланд бардоштани фаъолнокии иқтисодии аҳолӣ, такмили низоми соҳибкориву сармоягузорӣ ва тавсеаи иқтисодиёти рақамӣ диққати аввалиндараҷа дода шавад.
Худойдод АВҒОНОВ, донишҷӯи Академияи
идоракунии давлатии назди Президенти Ҷумҳурии Тоҷикистон
Баёни ақида (0) Санаи нашр: 15.06.2020 №: 110 Мутолиа карданд: 709
