фарҳанг
РӮЗГОРЕ БАРОИ ИБРАТ
Олим Оқилов. Ҳама бо меҳру муҳаббат ин номро ба забон мегиранд, хурду калон ӯро эҳтиром менамоянд. Суҳбатороиву ҳазлҳои намакинаш ба ақлу ҳуш таровати тоза бахшида, оинаи қалбу ҳузури ҷонҳо мегардид. Ӯ бо корҳои неки анҷомдодааш писанди ҳамагон гашта, ҳазорон дармондаю ятим ва корафтодаро шод кардаву раҳнамои эшон гардидааст.
Ин лаҳза ҳолномаи ӯро варақгардон намуда, ба хотир меоварем, ки Олим Оқилов 15.05.1939 дар деҳаи Хушекати ноҳияи Айнӣ, дар оилаи колхозчӣ ба дунё омада, бо кору пайкори нек аз хурдсолӣ дар дили мардуми кӯҳистони ноҳияи Айнӣ лонаи меҳр гузошт. Ӯ дар хурдӣ аз падару модар ятим монда, меҳнати содиқонаро аз пирони батадбир омӯхт. Соли 1959 омӯзишгоҳи тиббии ба номи академик Павлови шаҳри Хуҷандро бо ихтисоси фелдшер хатм намуда, фаъолияти меҳнатиро дар беморхонаи марказии ноҳияи Айнӣ оғоз кард. Баъдтар, дар беморхонаи марказии № 1 шаҳри Душанбе корашро давом дод. Соли 1961 ба Донишгоҳи давлатии тиббии Тоҷикистон ба номи Абуалӣ ибни Сино дохил шуд ва фаъолияти меҳнатиашро дар беморхонаи Қарияи Боло (ҳоло шаҳраки Шифобахш) идома бахшид. Соли 1967 донишгоҳро хатм намуда, ҳамчун табиби ҷарроҳ ба беморхонаи марказии ноҳияи Айнӣ ба кор омад.
Дар давраи фаъолияти ӯ дар беморхонаи марказии ноҳия поквиҷдонӣ, интизоми хуби меҳнат, ташаббускориву серталаб будан нисбат ба кор, бо ҳамкорону беморон хушмуомила буданро ба ҳамкорон талқин менамуд. Маҳз дар ҳамин замон шумораи табибони маълумоти олидори муассисаҳои тандурустии ноҳия аз 17 ба 112 нафар, кормандони миёнаи тиббӣ аз 175 ба 580 нафар афзуд, теъдоди беморхонаҳо, марказҳои саломатӣ, бунгоҳҳои тиббӣ, нуқтаҳои ёрии таъҷилӣ низ зиёд гардида, муассисаҳои соҳа бо таҷҳизоти тиббӣ, нақлиёт таъмин карда шуд. Бо ташаббуси ӯ дар ноҳияи Айнӣ филиалҳои омӯзишгоҳи тиббии шаҳри Хуҷанд ва коллеҷи тиббии шаҳри Панҷакент кушода шуд.
Хизматҳои арзишманди Олим Оқилов бо унвони фахрии Корманди шоистаи Ҷумҳурии Тоҷикистон, нишонҳои Аълочии тандурустии Иттиҳоди Шӯравӣ, Аълочии мудофиаи шаҳрвандӣ, Аълочии мудофиаи санитарии Иттиҳоди Шӯравӣ ва ифтихорномаҳо қадрдонӣ шудааст.
Ҳабиб СУЛАЙМОНӢ,
сармуҳаррири муассисаи нашриявии «Ирфон»
Баёни ақида (0) Санаи нашр: 15.06.2020 №: 110 Мутолиа карданд: 577
