иқтисод
ХАТЛОН. ИЛҲОМИ ТОЗА АЗ ҲИДОЯТҲОИ ПЕШВО
Бо назардошти вазъи имрӯзаи ҷомеаи ҷаҳонӣ Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳама кишоварзони кишварро муваззаф карданд, ки нақшаи ҷумҳуриявии кишти зироатҳо, аз ҷумла, майдони кишти картошка 40 дарсад ва кишти такрорӣ аз ҳисоби ғалладона, лӯбиё ва ҷуворимаккаи дон то 60 дарсад зиёд карда шавад.
Вобаста ба ин дар вилояти Хатлон, хусусан доир ба вусъати киштукори баҳорӣ, истифодаи самараноки замин ва таъмини фаровонии бозори истеъмолӣ бо маҳсулоти хушсифати ватанӣ аз ҷониби ҳама ташкилоту идораҳо чорабиниҳои зарурӣ роҳандозӣ гардиданд.
Ғазалшо Сафарзода, роҳбари дастгоҳи раиси вилоят, гуфт, ки бо мақсади иҷрои саривақтии дастурҳои Пешвои миллат аз ҷониби мақомоти иҷроияи ҳокимияти давлатӣ чор гурӯҳи корӣ ташкил шуда, оид ба истифодаи дурусти қитъаҳои замини назди ташкилоту идораҳо, манзилҳои зист ва хоҷагиҳои деҳқонӣ корҳои фаҳмондадиҳӣ ҷараён доранд.
Аз ҷумла, роҳбарияти Донишгоҳи давлатии Бохтар ба номи Носири Хусрав аз панҷ гектар замини дарихтиёрдоштааш дар 3 гектар боғ бунёд карда, ду гектари дигарро картошка ва пиёзу полизиҳо кишт намудааст. Дар байни қатори дарахтон низ зироатҳои кишоварзӣ кишт шудааст.
Дар замини назди бинои кумитаи иҷроияи ҲХДТ дар вилояти Хатлон низ ба ҷуз дарахтҳои меваи гелос ва хурмою зардолу, шафтолу, олуболу, ангур помидор, қаланфур, лӯбиё, кашничу шибит ва занҷабил кишт гардидаанд.
- Ният дорем, ки ҳосили гирифтаро ба кормандон ройгон тақсим кунем. Аз ин ҳисоб онҳо аз маводи ғизоӣ таъмин карда мешаванд, – гуфт Асадулло Убайдуллоев, боғбони кумитаи иҷроияи ҳизбӣ.
Баҳромшоҳ Акобиров, сокини ноҳияи Кӯшониён, чанд сол аст, ки дар замини наздиҳавлигии худ гулкарам ва картошка мекорад. Баъд аз ҷамъоварии ҳосил ҷуворимаккаи дон, помидор, бодиринг ва дигар зироатҳои кишоварзӣ коштанист. Ба гуфтаи ӯ, агар ҳар ваҷаби заминро оқилона истифода барем, ниёз ба муҳоҷирати меҳнатӣ намемонад. Аҳли оилаи Баҳромшоҳ Акобиров чанд сол аст, ки ҳама каму кости зиндагиро аз ҳисоби истифодаи самараноки замин таъмин мекунанд.
Сокинони ноҳияҳои Вахшу Кӯшониён ҳам иброз медоранд, ки ҳеҷ гоҳ онҳо аз бозор маҳсулоти кишоварзӣ, аз ҷумла картошка, лӯбӣ, нахӯд, помидор ва бодиринг намехаранд. Онҳо замини наздиҳавлигиро холӣ намегузоранд ва ҳатто дар 0,4 гектар картошка, лӯбӣ, помидор ва бодиринг кишт карда, худро бо маҳсулот таъмин менамоянд.
Амирбеки Темур, сардори Сарраёсати кишоварзии вилоят, гуфт, ки деҳқонони соҳибтаҷрибаи хатлонзамин ҳамасола майдони киштро зиёд намуда истодаанд.
- Онҳо то ин дам қариб дар 300 ҳазор гектар аз ҳама намуди зироатҳои кишоварзӣ кишт намуданд. Аз ин 128 ҳазору 142 гектар ғалладона, 113 ҳазору 498 гектар гандум, 3 ҳазору 548 гектар ҷуворимакка, 8 ҳазору 748 гектар ҷав мебошад. Барзгарони вилоят 117 ҳазору 652 гектар зироатҳои техникӣ коштанд, ки аз ин пахта 108 ҳазору 888 гектар, офтобпараст 707 ва зағер 4 ҳазору 751 гектарро ташкил медиҳад. Баробари ин, дар 9 ҳазору 556 гектар полизиҳо ва 19 ҳазору 371 гектар сабзавот кишт шудааст.
Ҳамчунин, кишти пиёз ба 10 ҳазору 440 гектар, сабзӣ 2 ҳазору 89 гектар, карам 922, помидор 2 ҳазору 887, бодиринг 1 ҳазору 750, картошка ва зиротҳои дигар ба 5 ҳазору 438 гектар баробар гардидааст. Дурнамои кишти заминҳои наздиҳавлигӣ 307 ҳазору 944 гектар муайян шуда, кишти такрории зироатҳо 143 ҳазору 28 гектар дар назар аст, - гуфт ӯ.
Мутаассифона, дар баъзе аз шаҳру ноҳияҳои вилояти Хатлон сокинон, кормандони ташкилоту идораҳо ва роҳбарони хоҷагиҳои деҳқонӣ ба масъалаи вусъати кишти зироатҳо бепарвоӣ зоҳир менамоянд.
Сафарбек Шарифзода, муовини роҳбари ситоди вилоятӣ оид ба истифодаи пурсамари замин, гуфт, ки аз ҷумла дар ноҳияи Хуросон қисме аз заминҳои наздиҳавлигӣ ва ташкилоту идораҳо, хоҷагиҳои деҳқонӣ, байни қаторҳои дарахтони боғҳо ва заминҳои назди масҷидҳо дуруст истифода намешаванд. Ҳол он ки ҳар як шаҳру ноҳияи вилоят барои таъмини аҳолии худ заминҳои дарихтиёрдоштаашро бояд самаранок истифода намояд, то аз маҳсулоти воридотии кишоварзони минтақаҳои дигар вобаста набошад.
Зокир ҲАСАН, “Ҷумҳурият”,
Д. РАҲМОНАЛӢ, рӯзноманигор
Баёни ақида (0) Санаи нашр: 16.06.2020 №: 111 Мутолиа карданд: 781
