иқтисод
ХУҶАНД. КОРХОНАҲОИ САТН ВА «ҶАВОНӢ» БА ФАЪОЛИЯТ ПАРДОХТАНД
Раиси вилояти Суғд Раҷаббой Аҳмадзода бо фаъолияти корхонаҳои нассоҷии шаҳри Хуҷанд САТН ва «Ҷавонӣ» шинос шуд.
Тибқи иттилои шуъбаи иттилоотию таҳлилии дастгоҳи раиси вилоят, корхонаи САТН ба истеҳсоли сарулибос аз нахи пахта машғул аст. Дар коргоҳҳои он маҳсулоти хоми ватанӣ то ба коркарди ниҳоӣ расонда мешавад.
Пас аз маҳдудкуниҳои муваққатӣ, айни замон корхона бо иқтидори пурра ба фаъолият пардохт. Дар он қоидаҳои санитариву гигиенӣ риоя гардида, аз даромадгоҳ ҳар як корманд пас аз истифодаи маводи антисептикӣ вориди бино мегардад. Ҳамчунин, кормандон бо ниқоби тиббӣ ва оина барои чашм таъминанд, ки барои пешгирӣ аз сироятёбӣ равона шудааст.
Раиси вилоят аз ин изҳори қаноатмандӣ намуда, масъулони вилоятро муваззаф кард, ки дар дигар корхонаҳои истеҳсолӣ низ чунин тартиб ба роҳ монда шавад.
Чуноне иттилоъ доданд, маҳсулоти коргоҳ барои содирот нигаронда шуда, имрӯзҳо ниқобҳои тиббии он ба кишварҳои Аврупо бароварда мешавад.
ҶДММ «Ҷавонӣ» аз ҷумлаи дигар корхонаҳои нассоҷии шаҳри Хуҷанд буда, дар он матоъ ва сарулибоси пахтагӣ истеҳсол мегардад.
Фаъолияти корхона ба татбиқи дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, яъне то коркарди ниҳоӣ расондани маҳсулоти хоми ватанӣ, равона гаштааст.
Кароматулло АТО,
«Ҷумҳурият»
Баёни ақида (0) Санаи нашр: 19.06.2020 №: 113 Мутолиа карданд: 990
