фарҳанг
ШАМЪИ ХОТИРА.ДАР БОРАИ ЛАВҲАҲОИ ЁДГОРИИ ШАҲИДОНИ ҶБВ
Соли 2020 дар китоби таърихи мардуми сайёраи Замин ҳамчун соли ҷашнгирии 75 - солагии Ғалабаи оламшумул дар Ҷанги дуюми ҷаҳонӣ бар фашизм сабт гардид. Дар ин набарди ҳаёт бо марг зиёда аз 50 миллион одам ҷон бохт. Аз Тоҷикистон зиёда аз 300 ҳазор нафар дар ин ғалаба саҳм гирифт, 90 ҳазор ҷанговар ҳалок гашт, 60 ҳазор тан захмҳои ҷонсӯз бардошта, маъюб шуд. Аз ноҳияи Дарвоз низ 700 нафар иштирок дошт. Нафарони бисёре аз ҷанговарони ин музофоти кӯҳистон дар муҳорибаҳои шадид қаҳрамонона ҳалок шуданд. Танҳо қисми каме ҷароҳате дар бадан ва доғе дар қалб ба зодгоҳ баргашт. Аз ин шумораи собиқадорони Ҷанги Бузурги Ватанӣ ҳоло нафаре, ки зинда мондааст, Додихудо Солеҳови 93 - сола мебошад, ки дар деҳаи Зинги Ҷамоати деҳоти Қалъаихум ба сар мебарад.
Тибқи иттилои раиси шӯрои собиқадорони ҷанг ва меҳнати ноҳияи Дарвоз Муҳаммаднабӣ Назиров, дар доираи сазовор истиқбол гирифтани ҷашнҳои 75 - солагии Ғалаба бар фашизми гитлерӣ ва 30- юмин солгарди Истиқлолияти давлатии кишвар бо дастгирии узви Маҷлиси миллии Маҷлиси Олии Ҷумҳурии Тоҷикистон, раиси ноҳия Абдураҳмонзода Саидбурҳони Саидраҳмон, ёрии соҳибкорон ва шахсони босаховати чор Ҷамоати деҳоти ноҳия таҳти шиори «Ҳеҷ кас ва ҳеҷ чиз фаромӯш нашудааст» кори хайре ба ҷо оварда шуд. Онҳо қариб 15 ҳазор сомонӣ ҷамъ оварда, 21 адад тахтасанги мармар харид карда, дар марказҳои деҳоти Қалъаихумб, Нулванд, Вишхарв ва 17 мавзеи ҷамоатҳо лавҳаҳои ёдгорӣ гузоштанд. Дар рӯи ҳар лавҳа 40-50 ному насаб, соли таваллуд, вақти ҳалок гаштан ва вафоти ҷанговарон сабт гардидаанд.
Мутаассифона, бо сабаби бемории COVID - 19 ба ҷо овардани ин амали хайр ва ватандӯстона дар деҳаҳои Ҷамоати деҳоти Сағирдашт каме ба таъхир афтод. Ҳоло аз ҷониби масъулон тасмим гирифта шудааст, ки дар работи марказии деҳот ва рустоҳои калонтари ин минтақаи баландкӯҳ низ чунин лавҳаҳо ба хотири пос доштани номи неки собиқадорони Ҷанги Бузурги Ватанӣ дар кӯтоҳтарин фурсат гузошта шаванд.
Зикр кардан ба маврид аст, ки бо супориши муовини Раиси Маҷлиси миллии Маҷлиси Олии Ҷумҳурии Тоҷикистон, раиси Вилояти Мухтори Кӯҳистони Бадахшон Ёдгор Файзов барои сабти ному насаби иштирокдорони Ҷанги дуюми ҷаҳонӣ дар шаҳри Хоруғ низ чунин лавҳаҳои ёдгорӣ насб карда мешаванд.
Дар ин соли Ҷашни 75 - солагии Ғалаба Додихудо Солеҳов ҳамсолони ҷавонашро, ки дар набардҳо иштирок карда, бисёрашон ғӯрамарг гаштанд, бо дарду алам ба хотир меорад. Ӯ имрӯзҳо гули сари сабади ҳамаи ҷамъомадҳо ва маҳфилҳо мебошад. Мақомоти иҷроияи маҳаллии ҳокимияти давлатии ноҳия ва дигар идораву муассисаҳои масъул дар ҳаққаш пайваста ғамхорӣ менамоянд, то ки ин ҷанговари куҳансол рӯзгори шоиста ва хушу хуррам дошта бошад.
Ин пири ботадбир ҳоло ҳам дар замини наздиҳавлигӣ ва боғи мевадораш машғули кор аст. Ӯ аз он хушнуд аст, ки умраш вафо намуд ва шоҳиди бунёди шоҳроҳи байналмилалии автомобилгарди Душанбе - Кӯлоб - Дарвоз - Хоруғ - Қулма гардид. Суханронии пурмуҳтавои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба муносибати 75 - солагии Рӯзи Ғалаба дар майдони Ғалабаи шаҳри Душанбе аз «оинаи нилгун» бо мароқ дидаасту умед дорад, ки паради ҳарбии идонаро ба ифтихори 75 - умин солгарди Ғалаба дар Ҷанги Бузурги Ватанӣ дар шаҳри Москва, ки 24 июн баргузор мегардад, тамошо мекунад. Устод Лоиқ дар ин маънӣ хеле хуб гуфта: «Охирин умеди ин умедворон зинда бод».
Муҳаммадзоиршо ШАРИФЗОДА, «Ҷумҳурият»,
Сироншоҳи ДИЛОВАР, рӯзноманигор
Баёни ақида (0) Санаи нашр: 22.06.2020 №: 114 Мутолиа карданд: 578
